მოკლედ: ჯანდაცვის სამინისტროს ინფორმაციით, ონკოლოგიური დიაგნოზის მქონე ბავშვებს, სახელმწიფო პროგრამის ფარგლებში, საზღვარგარეთ მკურნალობა კიდევ სამ კლინიკაში შეეძლებათ.

  • ეს კლინიკებია: აჯიბადემის ჰოსპიტალი, ლივ ჰოსპიტალი და ჰოსპიტალი მემორიალი.
  • სამივე კლინიკა თურქეთში მდებარეობს.

დეტალები: ჯანდაცვის სამინისტრო განმარტავს, რომ 2023 წლიდან დღემდე, მას შემდეგ, რაც სახელმწიფომ, ონკოლოგიური დიაგნოზის მქონე ბავშვების სამკურნალოდ "უპრეცედენტო პროგრამა დაიწყო", ბავშვების მკურნალობა უკვე 6 კლინიკაშია შესაძლებელი, მათ შორის ისრაელისა და ესპანეთის მაღალტექნოლოგიურ, მრავალპროფილურ სამედიცინო ცენტრებში. "ჯანდაცვის სამინისტრო აქტიურად მუშაობს ევროპის სხვა წამყვან სამედიცინო დაწესებულებებთანაც", — აცხადებს უწყება.

ასევე, მათი თქმით,

  • პროგრამაში 50-ზე მეტი ბავშვია ჩართული.
  • პროგრამის ფარგლებში ფინანსდება დიაგნოსტიკა და მკურნალობის კურსი —ქიმიოთერაპია, სხივური თერაპია, ოპერაციული ჩარევა და პროტონოთერაპია.

კონტექსტი: ჯანდაცვის სამინისტრო ამ განცხადებას ავრცელებს იმ ფონზე, როდესაც 12 თებერვალს, ონკოპაციენტების ნაწილმა მთავრობის ადმინისტრაციასთან მორიგი საპროტესტო აქცია გამართა, სახელმწოდებით — "მინდა ვიცოცხლო."

  • ისინი სახელმწიფოსგან ითხოვენ, სრულად დაფინანსდეს ყველა ონკოპაციენტის მკურნალობა და აღმოიფხვრას ქვეყანაში მათი ჯანმრთელობისა და სიცოცხლისთვის საჭირო წამლების დეფიციტი და შეახსენებენ ხელისუფლებას, რომ შეასრულოს დადებული პირობა.
  • იმავე მოთხოვნით, აქცია გაიმართა საქართველოს პარლამენტთან 4 თებერვალსაც.