აღმოსავლეთ ჩინეთის ქალაქ ჰეფეიში, ტიანის ტბაში თვითმართული კატერები ჩაუშვეს, რომლებიც ადამიანებს დახრჩობისგან იხსნის. აღნიშნულ ტბაში, 2016 წელს, 15 ადამიანი დაიხრჩო, ხოლო 2004 წლიდან დღემდე - 66.

ავტონომიური ხომალდი GPS-ით, კამერით, აკუსტიკური და ინფრა-წითელი სენსორებითაა აღჭურვილი.

ფოტო: Hefei Police

ფოტო: Hefei Police

კატერი ერთიანი სისტემის ნაწილია, რომელიც ნაპირზე დამონტაჟებული ოცამდე ოპტიკური და ინფრა-წითელი სენსორებისა და რადიო გადამცემისგან შედგება. ეს სენსორები ტბას რამდენიმე სექტორად, სახიფათო და უსაფრთხო ზონებად ყოფს.

იმ შემთხვევაში თუ მოცურავე ტბის სახიფათო ზონაში შევა, კატერი მას გაფრთხილების სიგნალს მისცემს და ამავე დროს, მაშველებს გადასცემს მის ლოკაციას. ხოლო თუ ადამიანები კატერზე ჩაჭიდებას მოახერხებენ, მაშინ მოწყობილობა მათ ნაპირამდე ან უსაფრთხო ზონამდე მიიყვანს.

კატერის გარდა, ტბის სამაშველო სამსახურის განკარგულებაში სამი დრონია, რომლითაც გასაჭირში მყოფ ადამიანს სამაშველო რგოლს, საჭმელს ან მედიკამენტებს მიაწვდიან, ვიდრე მათთან მაშველები მივლენ.

სისტემა შარშან ნოემბერში ჩაეშვა და მას შემდეგ, ტბაში არც ერთი ადამიანი არ დაღუპულა.