ქართული მუსიკის განვითარების ისტორიაში ერთ-ერთი ყველაზე მნიშვნელოვანი წვლილი გიული ჩოხელს მიუძღვნის. ქართული ჯაზის ცოცხალი ლეგენდის სიმღერა ალბათ ერთხელ მაინც გექნება წაღიღინებული იმის ცოდნის გარეშე, რომ მათი შემსრულებელი სწორედ ჩოხელია.

მომღერლის კარიერა საბჭოთა კავშირის პერიოდს, კერძოდ კი, 1950-იან წლებს, უკავშირდება. ვოკალისტი უფრო პოპულარული 70-იან წლებში გახდა, როცა მუსიკალური ფირფიტების გამოშვება და ევროპის მასშტაბით მუსიკალურ ტურნეებში მონაწილეობა დაიწყო.

გიული ჩოხელს კულტურის დარგში შეტანილი წვლილისთვის არაერთი ჯილდო აქვს მოპოვებული, ხოლო ვარსკვლავი 2015 წლის 28 მარტს გაუხსნეს. 89 წლის მომღერალი დღემდე არ კარგავს აქტუალობას და ერთ-ერთ ყველაზე დასამახსოვრებელ ქართველ არტისტად რჩება.

ცნობილი მომღერლის შესახებ საზოგადოების ნაწილს ჯერაც არ სმენია, სწორედ ამიტომ, თუ გინდა გიული ჩოხელის შემოქმედებას უკეთ გაეცნო და არ იცი, საიდან დაიწყო, ამ სტატიაში 5 სიმღერის შესახებ მოგიყვები.

1. წამოვალ

რა თქმა უნდა, ეს სია ჩოხელის ერთ-ერთი ყველაზე ცნობილი შესრულებით უნდა დავიწყოთ. ფართო საზოგადოება ჯაზის ლეგენდას სწორედ სიმღერით წამოვალ იცნობს. მისი მუსიკის ავტორი ზურა ნადარაიაა, ტექსტის კი — თემურ ცაგურია.

ალბომი ეს იყო სიზმარი იმ იშვიათი ფირფიტებიდანაა, რომელმაც თანამედროვეობამდე მოაღწია და საშუალებას გვაძლევს, გიული ჩოხელის წამოვალ და სხვა შესანიშნავი შესრულებები მოვისმინოთ.

მომღერალს უნდოდა, რომ ინგლისურად მეტი სიმღერა შეესრულებინა, ამიტომ, მიუხედავად საბჭოთა რეჟიმისა, ამ ენაზე შესრულებული რამდენიმე სიმღერაც დაგვრჩა, მაგრამ ბუნებრივია, სიმღერების უმეტესობა რუსულ და ქართულ ენებზეა ჩაწერილი.

2. პაემანზე

1970 წელს გამოსული პაემანზე ჯაზის სამყაროში გვამოგზაურებს და წარმოდგენას გვიქმნის ჯადოსნურ მუსიკაზე, რომელსაც გიული ჩოხელი ქმნიდა.

პოპულარული სიმღერის პაემანზე მელოდია გამოჩენილი ბრაზილიელი მუსიკოსის, ანტონიო კარლოს ჟობიმის, 1963 წლის ჩანაწერის Agua de Beber ინსპირაციითაა შექმნილი, ტექსტი კი იოსებ ნონეშვილს ეკუთვნის.

3. ეს იყო სიზმარი

ცნობილი მსახიობისა და კომპოზიტორის, ივიკო საყვარელიძის, ტექსტის მიხედვით შექმნილი სიმღერა ეს იყო სიზმარი, როგორც უკვე იცი, მთლიანი ალბომის სათაურადაც იქცა. მიუხედავად იმისა, რომ ეს შესრულება ათწლეულებს ითვლის, ის დღემდე ინარჩუნებს პოპულარობას ახალგაზრდა თაობის მომღერლებში და მის თანამედროვე ვერსიებს ხშირად მოისმენ.

4. მზე ჩემი კარგი მეგობარია

ჯაზის ლეგენდის სტილს განსხვავებულ ხმასთან ერთად გაგრძელებული ხმოვნებითა და დარბილებულ თანხმოვნებითაც იცნობ, რისი კარგი მაგალითიც ეს სიმღერაა. დარწმუნებული ვარ, მზე ჩემი კარგი მეგობარია აქამდეც მოგისმენია ან მისი მელოდია გეცნო, თუმცა შეიძლება, არ იცოდე, რომ მას წარსულში გიული ჩოხელი ასრულებდა.

5. ჩავაქრე სანთელი

გიული ჩოხელი საქართველოს სახელმწიფო საესტრადო ორკესტ რეროსთნ ერთადაც მუშაობდა. მათი ერთ-ერთი ყველაზე ცნობილი დუეტი სიმღერა ჩავაქრე სანთელია. შესრულებას ჯაზის არაჩვეულებრივი მელოდიაც გამოარჩევს. მუსიკის ავტორი გურამ ბზვანელი, ტექსტის ავტორი კი ცნობილი პოეტი იოსებ გრიშაშვილია. სიმღერის არანჟირება კონსტანტინე პევზნერსა და ორკესტრ რეროს ეკუთვნის.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...