ცოტა ხნის წინ Inside Out 2-ის კიდევ ერთი ტრეილერი გამოვიდა და როგორც ჩანს, ანიმაციის ახალი პერსონაჟი მოსვენებას არც მაყურებლებს მოგვცემს. Inside Out 2-ს მაყურებელი ზაფხულში იხილავს, ანიმაციაში კი კარგად ნაცნობი პერსონაჟების გარდა ახალ ემოციას — შფოთვას გავიცნობთ.

ორიგინალური ანიმაცია Inside Out, რომელიც Pixar-მა 2015 წელს შექმნა, მაყურებლის დიდი მოწონება დაიმსახურა. 9-წლიანი პაუზის შემდეგ კი ანიმაცია ტელეეკრანებზე მეორე ნაწილით ბრუნდება. როგორც ვიდეოდან ჩანს, ანიმაციის მეორე ნაწილში მთავარი პერსონაჟი რაილი უკვე 13 წლისაა. Inside Out გამორჩეული და ორიგინალური იმითაა, რომ ანიმაციის ძირითადი სიუჟეტი რაილის ტვინში ვითარდება, სადაც ემოციებს პერსონაჟების სახით ვეცნობით.

რაილის ტვინში ხუთი ემოცია — სევდა, ბედნიერება, სიბრაზე, შიში და ზიზღი — თითოეულ ნაბიჯს აკონტროლებს და რაილის შესაბამის ქმედებებსაც კარნახობს. Inside Out 2-ში კი ნაცნობ ემოციებს შფოთვასთან უწევთ შეხვედრა, რომელიც აშკარაა, რომ არსად წასვლას არ აპირებს. როგორ განვითარდება მოვლენები, ამას სულ მალე ვნახავთ.

Inside Out 2-ის პრემიერა 2024 წლის 14 ივნისს შედგება.