რა ხდება: დღეს, 2024 წლის 6 თებერვალს საქართელოს პარლამენტში საქართველოს პრეზიდენტი დეპუტატებს წლიური მოხსენებით მიმართავს.

რატომ არის მნიშვნელოვანი: სალომე ზურაბიშვილი პარლამენტის ტრიბუნიდან აცხადებს, რომ საზოგადოების კითხვების მთავარი ადრესატი დღეს არც პრემიერია, არც პარლამენტის თავჯდომარე და არც — მმართველი პარტიის თავმჯდომარე, "არამედ ის, ვინც რეალურად მართავს ქვეყანას", — ამბობს პრეზიდენტი ზურაბიშვილი.

  • "ამიტომ, მივმართავ ბიძინა ივანიშვილს: საზოგადოებას აქვს სრული უფლება, თქვენგან მოისმინოს, რას ნიშნავს თქვენი დაბრუნებისას წარმოთქმული სიტყვები კორუფციაზე, ქვეყნის საგარეო კურსზე? საზოგადოებამ არ იცის, ვინ და რატომ გაუშვით, ან ვინ რატომ მოგყავთ. მათ ქვეყნის წინაშე არსებული დანაშაულისა, თუ განსხვავებული აზრების გამო უშვებთ, თუ კიდევ სხვა მიზეზების გამო, რაც არ ვიცით?"

ზურაბიშვილი ასევე მიმართავს ბიძინა ივანიშვილს, რომ რადგან საზოგადოება მმართველობის ახალ, ევროპულ მოდელს ელოდება, "ისიც უნდა იცოდეს და უნდა უთხრათ, თუ როგორ აპირებთ ერთპარტიული, ერთპიროვნული და ვერტიკალური მოდელიდან დემოკრატიულ, ევროპულ მოდელზე გადასვლას და როდის; საზოგადოება თქვენგან პასუხს ელოდება, როდის ჩამოაშორებთ სასამართლოს მურუსიძე ჩინჩალაძეს, მაშინ, როცა ერთი მხრივ, ებრძვით ან ასე ამბობთ ნაციონალურ მოძრაობას და მეორე მხრივ კი, მის გადმონაშთებს არაფერი ემუქრებათ."

გარდა ამისა, პრეზიდენტმა დღეს ისაუბრა სამთავრობო გეგმაზეც: "წარმოადგენთ თუ არა გეგმას: სადაც მკაფიოდ და ვადებში იქნება გაწერილი, როგორ შეცვლით იუსტიციის უმაღლესი საბჭოს და უზენაესი სასამართლოს შემადგენლობას; სადაც გაწერილი იქნება, როგორ უზრუნველყოფთ კონსენსუსით საარჩევნო ადმინისტრაციის დაკომპლექტებას;
სადაც ანტიკორუფციულ სამსახურს მისცემთ საგამოძიებო უფლებებს და დამოუკიდებლობას; სადაც უზრუნველყოფთ ეროვნული ბანკის დამოუკიდებლობას და როგორ დავუახლოვდეთ ევროკავშირის საგარეო და უსაფრთხოების პოლიტიკას.
თუმცა, საზოგადოების კითხვების მთავარი ადრესატი დღეს არც პრემიერია, არც პარლამენტისა და არც მმართველი პარტიის თავმჯდომარე, არამედ ის, ვინც რეალურად მართავს ქვეყანას."

გაიგე მეტი: რაზე საუბრობს პრეზიდენტი პარლამენტში