ჯეიმი დორნანმა ახლახან მიცემულ ინტერვიუში Fifty Shades of Grey-ის პრემიერისა და უარყოფითი შეფასებების პერიოდი გაიხსენა. ჯეიმის თქმით, რომელიც ფილმში კრისტიან გრეის როლს ასრულებს, კრიტიკოსების დაცინვამ მასზე ისე ცუდად იმოქმედა, რომ ცოტა ხნით ყველასგან მიმალვა გადაწყვიტა.

როგორც მსახიობი იხსენებს, ოჯახთან ერთად დამალვაში Fifty Shades of Grey-ის რეჟისორი, სემ ტეილორ-ჯონსონი, დაეხმარა. "ჩვენ სემისა და აარონ ტეილორ-ჯონსონების სოფლის სახლში წავედით. სემმა და აარონმა უფლება მოგვცეს, ცოტა ხნით იქ გვეცხოვრა, ამ ყველაფრისგან დავმალულიყავით და სამყაროს ცოტა ხნით მოვშორებოდით", — განაცხადა ჯეიმი დორნანმა.

ფოტო: Universal Pictures

მიუხედავად უარყოფითი შეფასებებისა, Fifty Shades of Grey-მ მაყურებლები ეკრანთან მიიზიდა და კომერციულ წარმატებას მალევე მიაღწია. ფილმის შემოსავალი მსოფლიოს მასშტაბით $569 მილიონი იყო, რამაც ტრილოგიის შემდეგი ნაწილების გადაღებაც განსაზღვრა.

ინტერვიუში ჯეიმი დორნანმა ისიც გაიხსენა, რომ კრისტიან გრეის როლი თავიდან ჩარლი ჰანემს უნდა შეესრულებინა. მოგვიანებით, ჰანემმა პროექტი დატოვა და ამის მიზეზად სცენარი დაასახელა. შემდეგ კი, გრეის როლზე უკვე ჯეიმი დორნანი დამტკიცდა.

შეგახსენებთ, რომ Fifty Shades of Grey ბრიტანელი მწერლის, ე.ლ. ჯეიმსის, იმავე სახელწოდების ბესტსელერი ტრილოგიის მიხედვით გადაიღეს. ტრილოგია დღემდე მსოფლიოში ერთ-ერთ ყველაზე პოპულარულ წიგნების სერიად მიიჩნევა. ტრილოგიის პირველი ნაწილი ბრიტანეთში ყველა დროის ყველაზე სწრაფად გაყიდვადი რბილყდიანი გამოცემა გახდა. ჯამში, Fifty Shades of Grey 52 ენაზე ითარგმნა და 150 მილიონზე მეტ ეგზემპლარად გაიყიდა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...