პუბლიკის ინფორმაციით, ბერლინის 74-ე საერთაშორისო კინოფესტივალის კინობაზრობაზე (EFM) კულტურის სამინისტროს დაქვემდებარებული ეროვნული კინოცენტრის სტენდს წელს 32-წევრიანი დელეგაცია წარადგენს, რაც წინა წლებთან შედარებით საკმაოდ დიდი რაოდენობაა. ასევე, პუბლიკამ მოიპოვა იმ ადამიანთა სია, რომლებიც კინობაზრობაზე კინოცენტრის ოფიციალური წარმომადგენლები იქნებიან.

ბერლინის 74-ე საერთაშორისო კინოფესტივალის კინობაზრობაზე კინოცენტრის დელეგაციაში POSTV-ის წამყვანი გური სულთანიშვილი და ამავე არხის ჟურნალისტი სალომე გობრონიძე იქნებიან. კინოცენტრი გური სულთანიშვილს ბერლინალეზე გზავნის როგორც კინოექსპორტის სპეციალისტს, ხოლო POSTV-ის ჟურნალისტ სალომე გობრონიძეს — როგორც პიარის დეპარტამენტის თანამშრომელს.

გური სულთანიშვილმა პუბლიკასთან მიცემულ ინტერვიუში განაცხადა, რომ ბერლინალეზე ქართული სტენდის გასაშუქებლად მიემგზავრება, ხარჯებს კი კინოცენტრი დაფარავს. გარდა ამისა, ანაზღაურების სახით 200 ლარსაც მიიღებს.

"მანდ კეთდება პირველი ქართული სტენდი. შესაბამისად, ამის გაშუქებას ვაპირებ, როგორც კულტურის კრიტიკოსი და ამ საკითხის ერთ-ერთი სპეციალისტი. 3 დღით მივდივარ და კინოცენტრი აფინანსებს. კინოცენტრთან ერთჯერადი თანამშრომლობის ფორმა გვაქვს გაფორმებული. გამოქვეყნდება ჩემს პირად Youtube-არხზე. ახალი წამოწყება მაქვს სრულიად ჩემი და დამოუკიდებელი. სამოგზაურო ბლოგი, რომლის სამუშაო სახელია "აღმოაჩინე ქალაქი", მაგის ფარგლებში იქნება ეს და განთავსდება ამ არხზე", — ამბობს სულთანიშვილი პუბლიკასთან ინტერვიუში.

ბერლინის 74-ე საერთაშორისო კინოფესტივალის კინობაზრობაზე კინოცენტრის დელეგაციის სხვა წევრებს შორის არიან კინოცენტრის მოქმედი თანამშრომლები: დირექტორის მოვალეობის შემსრულებელი კობა ხუბუნაია, ფილმწარმოების დეპარტამენტის უფროსი ბაჩო ოდიშარია, კინოექსპორტის დეპარტამენტის თავმჯდომარის მოვალეობის შემსრულებელი თამთა ახალაია, ფილმწარმოების დეპარტამენტის სპეციალისტი სალომე გოფოძე და საქართველოს წარმომადგენელი ევრიმაჟში გიორგი აგლაძე.

გარდა მოქმედი თანამშრომლებისა, კინოცენტრის წარმომადგენლებად მითითებულნი არიან: ტელეკომპანია იმედის სახე ნინი ბადურაშვილი, ამავე არხის ოპერატორი შოთა თუთაშვილი და ჟურნალისტი ქეთევან ჭეიშვილი.

ბერლინის საერთაშორისო კინოფესტივალი 2024 წლის 15-21 თებერვალს ჩატარდება.