ირაკლი ღარიბაშვილმა პრემიერ მინისტრობის პოსტი დატოვა. ამის შესახებ მან მთავრობის ადმინისტრაციაში გამართულ საგანგებო ბრიფინგზე განაცხადა.

რა თქვა: "მე ურთულეს შიდა, თუ საერთაშორისო პოლიტიკურ, ეკონომიკურ, თუ სოციალური კრიზისების პირობებში დავიწყე ჩემი პრემიერ-მინისტრობის მეორე ვადა და პირნათლად ვემსახურე ჩვენს ქვეყანას.

უკომპრომისოდ ვიცავდი ჩვენი ქვეყნისა და ხალხის ინტერესებს და ვამაყობ შედეგებით, რომელსაც ამ პერიოდში, გუნდთან ერთად მივაღწიეთ. მე, ორჯერ მომიწია ამ უმაღლეს თანამდებობაზე მუშაობა, ჯამში — ხუთი წლით."

ძვირფასო მეგობრებო, მსურს, საზოგადოებას ვაცნობო გადაწყვეტილების შესახებ, რომელზეც გუნდთან ერთად ვიმსჯელეთ. დღეს მე ვტოვებ პრემიერ-მინისტრის თანამდებობას. ნება მომეცით, მოკლედ, მაგრამ მკაფიოდ განვმარტო ამ გადაწყვეტილების მიზეზები: სულ ახლახან, გასული წლის ბოლოს, საზოგადოებას ჩავაბარე ვრცელი ანგარიში ჩემი 3-წლიანი მუშაობის შესახებ. მოგეხსნებათ, მთავრობის მეთაურის პოზიციაზე მეორე ვადით მუშაობა ურთულეს პერიოდში, შიდა თუ საერთაშორისო პოლიტიკური, ეკონომიკური, სოციალური კრიზისის პირობებში დავიწყე.

მე პირნათლად ვემსახურე ჩვენს ქვეყანას, უკომპრომისოდ ვიცავდი ხალხის და ქვეყნის ინტერესებს და მე ვამაყობ შედეგებით, რომელსაც, ამ პერიოდში, გუნდთან ერთად მივაღწიე.

ქართული ოცნების მმართველობის პერიოდში მე ორჯერ მომიწია ამ უმაღლეს თანამდებობაზე მუშაობა. ჯამში, ყველაზე დიდხანს, 5 წელი ვიყავი პრემიერ-მინისტრი.

ჩვენი პოლიტიკური გუნდის სიძლიერის ერთ-ერთი ფაქტორი არის ღია დემოკრატია, რომლის ყველაზე მკაფიო გამოვლინება გახლავთ როტაციის პრინციპი. გუნდში მრავალი წარმატებული ლიდერია და საჭიროა, სხვებსაც მიეცეთ შესაძლებლობა, მითუმეტეს, რომ ახლა ახალი ამოცანის წინაშე ვდგავართ — ქართული ოცნება უნდა მოემზადოს არჩევნების დამაჯერებლად მოსაგებად, რათა გავაგრძელოთ წინსვლა სხვა, უფრო დიდი მიზნების მისაღწევად.

აქედან გამომდინარე, პოლიტსაბჭოსგან მივიღე შეთავაზება, დავიკავო პარტიის თავმჯდომარის პოსტი. ამასთან დაკავშირებით, ყრილობა გაიმართება 1-ელ თებერვალს. არ დაგიმალავთ, რომ პოლიტსაბჭოში განვიხილეთ შესაძლებლობა, დავრჩენილიყავი პოსტზე ზაფხულში, საარჩევნო კამპანიის დაწყებამდე, თუმცა, ვარჩიე ახლა მიმეღო ეს გადაწყვეტილება.

მნიშვნელოვანია, შემდეგმა პრემიერმა დროულად წარადგინოს თავისი გუნდი და ჩამოაყალიბოს ახალი მთავრობა. მე წარმატებებს ვუსურვებ ახალ პრემიერ-მინისტრს.

ჩემთვის დიდი პატივი და პასუხისმგებლობაა, გავაგრძელო მუშაობა პარტიაში, აქტიური მონაწილეობა მივიღო საარჩევნო პროცესში და ზოგადად, ჩვენი ქვეყნის განვითარებაში.

პრემიერ-მინისტრობის პერიოდში გაწეული დახმარებისთვის უდიდეს მადლობას ვუხდი ჩვენი პარტიის დამფუძნებელს და საპატიო თავმჯდომარეს — ბიძინა ივანიშვილს, პარტიის და პარლამენტის ხელმძღვანელ პირებსა და წევრებს, სამინისტროს ხელმძღვანელებს და თითოეულ თანამშრომელს, მთავრობის ადმინისტრაციის თანამშრომლებს და ყველა საჯარო მოხელეს.

თანადგომისთვის განსაკუთრებული მადლობა მინდა გადავუხადო ჩემს მეუღლეს, შვილებს, მშობლებს. ახლა მექნება შესაძლებლობა, მეტი დრო დავუთმო ჩემს ოჯახს.

მშვიდობას, კეთილდღეობას და გაერთიანებას ვუსურვებ ჩვენს სამშობლოს", — თქვა მან.

  • ღარიბაშვილი მეორე ვადით პრემიერ-მინისტრად 2021 წელს დანიშნა "ოცნების" პოლიტსაბჭომ მას შემდეგ, რაც პრემიერობიდან გიორგი გახარია გადადგა.
  • მანამდე, ღარიბაშვილი ამ პოზიციას 2013-დან 2015 წლის დეკემბრამდე იკავებდა.

კონტექსტი: ღარიბაშვილის თანამდებობიდან წასვლა ნიშნავს, რომ შეიცვლება მინისტრთა კაბინეტიც, რომელსაც მომავალი პრემიერ-მინისტრი დააკომპლექტებს.

  • სახელისუფლებო არხის, იმედის მიერ დღეს გავრცელებული ინფორმაციის თანახმად, პრემიერ-მინისტრის პოსტზე ირაკლი ღარიბაშვილს ირაკლი კობახიძე შეცვლის.

მასალა განახლებადია.