საქართველოს თავდაცვის მინისტრმა აშშ-ის ატლანტიკურ საბჭოში სიტყვის გამოსვლისას თქვა, რომ საქართველო არ უნდა ცხოვრობდეს იმ რეალობაში, სადაც დომინანტი რუსეთის ინტერესებია:

"ძალიან ბევრს ვსაუბრობთ და ვმსჯელობთ იმაზე, თუ რა სურს რუსეთს და უნდა გვეშინოდეს თუ არა მისი გაღიზიანების, რაც ჩვენი ფუნდამენტური შეცდომაა".

თინათინ ხიდაშელის განცხადებით, არსებული გარემოება ქვეყანას აიძულებს, იცხოვროს სამყაროში, სადაც რუსეთის სურვილებია გადამწყვეტი და თანამედროვე მსოფლიოს პრობლემებს სწორედ ეს ფაქტი განსაზღვრავს.

თავდაცვის მინისტრმა შეხვედრაზე თქვა, რომ მისი აზრით რუსეთის გაღიზიანების მთავარი მიზეზი ენერგოუსაფრთხოებაა და არა ნატოს გაფართოების თემა:

"3.5-მილიონიანი მოსახლეობის ქვეყანა ნატოს შეუერთდება თუ არა მას არ აინტერესებს. საქმე საქართველოს გეოგრაფიულ მდებარეობაშია, რომელიც ევროპას ალტერნატიული ენერგორესურსებით მომარაგებას ჰპირდება, რუსეთს კი საერთო ენერგომომარაგების სურათს მიღმა ტოვებს... ფუნდამენტური და ფილოსოფიური პრობლემა არის ის, რომ ჩვენ პოლიტიკას ვაფუძნებთ შიშზე".

საქართველოს თავდაცვის მინისტრის ამერიკის შეერთებულ შტატებში იმყოფება. აღნიშნულ კონფერენციას აშშ-ის აკადემიური და საექსპერტო საზოგადოების წარმომადგენლები ესწრებოდნენ.