ცნობილი ქართველი კალათბურთელი და NBA-ს ჩემპიონი, ზაზა ფაჩულია, ღირსების ორდენით დაჯილდოვდება. ამის შესახებ ინფორმაციას საქართველოს პრეზიდენტის, გიორგი მარგველაშვილის ფეისბუკის ოფიციალური გვერდი ავრცელებს.

„საქართველოს პრეზიდენტის გადაწყვეტილებით, ქვეყნის სახელის საერთაშორისო ასპარეზზე გატანისა და საქართველოს პოპულარიზაციისათვის ზაზა ფაჩულია ღირსების ორდენით დაჯილდოვდება," - ვკითხულობთ განცხადებაში.

ამავე განცხადების მიხედვით, გიორგი მარგველაშვილის გადაწყვეტილება ზაზა ფაჩულიას პრეზიდენტის ადმინისტრაციის უფროსმა გიორგი აბაშიშვილმა აცნობა, NBA- ის ჩემპიონობა მიულოცა და პრეზიდენტის სახელით წარმატებები უსურვა.

ზაზა ფაჩულია NBA-ს ჩემპიონი Golden State Warriors-თან ერთად, 2016-2017 წლის სეზონში გახდა. ზაზა ფაჩულია პირველი ქართველი კალათბურთელია, რომელმაც კალათბურთის ყველაზე მნიშვნელოვანი ტიტული მოიპოვა.