ავრილ ლავინმა მუსიკალური ტურნე დააანონსა. მომღერალი ჩრდილოეთ ამერიკაში 27 კონცერტს გამართავს და თავის ყველაზე ცნობილ ჰიტებს შეასრულებს. ავრილმა სიახლის შესახებ გულშემატკივრებს სოციალური ქსელის მეშვეობით აცნობა და ტურნეს თარიღების კალენდარიც დადო.

"2024 წლის ტურნეს თარიღები! ჩემი ალბომებიდან ყველაზე ცნობილ ჰიტებსა და თქვენს საყვარელ სიმღერებს შევასრულებ. რა თქმა უნდა, ჩემი მეგობრებიც შემომიერთდებიან!" — წერს მომღერალი.

როგორც მუსიკოსიც აღნიშნავს, მას კონცერტებზე განსაკუთრებული სტუმრები, მუსიკალური ბენდები და მომღერლები ეყოლება, მათ შორის, ერთ-ერთმა ბენდმა, Simple Plan-მა, ავრილის ტურნეს შესახებ სოციალურ ქსელში დაწერა.

მათი თქმით, პირველად ლავინთან ერთად ტურნეზე 20 წლის წინ იყვნენ, რაც გასაოცარი გამოცდილება იყო და მოუთმენლად ელიან, ამდენი წლის შემდეგ, იმავეს როდის გაიმეორებენ.

ავრილ ლავინის მუსიკალური ტურნე მაისში დაიწყება და სექტემბრამდე გაგრძელდება. პოპპანკის პრინცესად მიჩნეული კანადელი მომღერალი, პოპულარობას უკვე 20 წელზე მეტია ინარჩუნებს. მას ეკუთვნის ისეთი ცნობილი სიმღერები, როგორებიცაა: Complicated, Girlfriend და სხვები.