თუ კონცერტზე გართობის დროსაც კი არ გტოვებთ იმაზე ფიქრი, რომ მეორე დილით ადრე ხართ ასადგომი, მაშინ ალბათ გაუგებდით მაიკლ ფელოუსს და ჯონათან ჰედენს, რომლებმაც საყვარელ პოპვარსკვლავს შოუზე დაგვიანებისთვის უჩივლეს.

ნიუიორკელმა მელომანებმა მადონას 13 დეკემბერს დაგეგმილი კონცერტისთვის შეიძინეს ბილეთები, რომლებზეც ეწერა, რომ შოუ საღამოს ცხრის ნახევარზე უნდა დაწყებულიყო. თუმცა, როგორც ფელოუსისა და ჰედენის სარჩელში წერია, მადონა სცენაზე დაახლოებით 22:45-ისთვის გამოჩნდა. მადონას, ბილეთების გამყიდველი კომპანიისა და კონცერტის მასპინძელი არენის წინააღმდეგ მომზადებულ სარჩელში ასევე აღნიშნულია, რომ ფანებს შინ დაბრუნებისას ტრანსპორტირების პრობლემაც შეექმნათ, რადგან კონცერტი ნაშუაღამევის პირველი საათისკენ დასრულდა. ფელოუსი და ჰედენი ამბობენ, რომ კონცერტის მეორე დღეს მათ "დილაადრიან მოუწიათ ადგომა, რათა სამსახურში წასულიყვნენ და ოჯახისთვის მიეხედათ". ისინი განმარტავენ, რომ შეთანხმება დაირღვა, რადგან კონცერტი დაგეგმილ დროს არ დაწყებულა. თუმცა, სარჩელში არაა დაკონკრეტებული, ზიანის რა სახით ანაზღაურება სურთ.

აღსანიშნავია, რომ ეს პირველი შემთხვევა არაა, როცა მადონას კონცერტზე დაგვიანებით მისვლისთვის უჩივიან. მის წინააღმდეგ მსგავსი სარჩელები მომზადდა წინა ტურნეს დროსაც, 2019 და 2020 წლებში. ორივე შემთხვევაში სარჩელი უკან გაიწვიეს.

65 წლის პოპვარსკვლავი ამჟამად რიგით მე-12 საკონცერტო ტურნეს, სახელწოდებით The Celebration Tour, აწყობს. ტურნე, რომელიც შარშან ოქტომბერში დაიწყო, ჩრდილოეთ ამერიკასა და ევროპაში ჯამში 79 კონცერტს მოიცავს. ამ ფორმით პოპის დედოფალი თავის 40-წლიან კარიერას აღნიშნავს.