მსახიობი პოლ მესკალი ახლახან მიცემულ ინტერვიუში საუბრობს იმაზე, თუ რა არ მოსწონს კინოინდუსტრიაში. მაგალითად, მისი თქმით, შეიძლება, მომავალში ჰოლივუდმა მსახიობის შერჩევისას მის ინსტაგრამ ფოლოვერების რაოდენობას უფრო მეტი ყურადღება მიაქციოს, ვიდრე ნიჭს.

მესკალი საზოგადოებამ ცნობილი სერიალით Normal People გაიცნო, ამის შემდეგ მან 2022 წელს Aftersun-ში შესრულებული როლისთვის ოსკარის ნომინაციაც მოიპოვა. ამჟამად მესკალი გლადიატორ 2-ზე მუშაობს. მსახიობი, ხოაკინ ფენიქსთან ერთად, ფილმში ერთ-ერთ მთავარ როლს შეასრულებს.

პოლმა აღნიშნა, რომ ფილმის მეორე ნაწილს ძალიან ბევრი ადამიანი ელოდება, ამიტომ ფიქრობს, რომ მისი გამოსვლის შემდეგ კიდევ უფრო პოპულარული გახდება. მესკალის თქმით, ეს მისი სამსახურის უსიამოვნო ნაწილია და არ უნდა, რომ ცნობადობამ მისი ცხოვრება შეცვალოს.

"შეიძლება, გულუბრყვილოდ ჟღერს, მაგრამ პოპულარობა ჩემთვის უმნიშვნელოა, ის არაფერს ცვლის. მგონი, უბრალოდ უფრო მეტი ადამიანი გაჩერებს ქუჩაში. თუ ასეა, იმედია, უფრო ცნობილი არ გავხდები", — ამბობს ის.

მსახიობმა იმაზეც ისაუბრა, რომ ჰოლივუდში მის პროფესიას არასერიოზულად აღიქვამენ, რაც ძალიან აღიზიანებს.

"ძალიან მაშინებს, როგორ უყურებენ ჰოლივუდში მსახიობობას. არ მინდა, რომ დღის ბოლოს გადამწყვეტი მნიშვნელობა ინსტაგრამზე ჩემი გამომწერების რაოდენობას ჰქონდეს. ბოლო წლებია, ადამიანები ფილმებსა და სერიალებზე ისე ლაპარაკობენ, როგორც კონტენტზე. ეს საშინელი სიტყვაა. მსახიობობა კონტენტის შექმნა არაა, სამსახურია", — აღნიშნავს მესკალი.

პოლის თქმით, ცნობადობის უარყოფითი მხარე პირადი სივრცის არქონაა და ესაა ერთ-ერთი მიზეზი, რატომაც გადაწყვიტა, ინსტაგრამი დახურული ჰქონოდა. მისი თქმით, საშინლად არ მოსწონს, როცა მის პირად ცხოვრებაზე კომენტარს აკეთებენ.