მოკლედ: მატრონა მოსკოველის ხატი, რომელზეც იოსებ სტალინია გამოსახული, სამების საკათედრო ტაძრიდან დროებით გაიტანეს, მის ადგილას კი განათავსეს სხვა ხატი, რომელზეც, ასევე, მატრონა მოსკოველია გამოსახული.

ფოტო: რადიო თავისუფლება

დეტალები: როგორც On.ge-სთან საუბრისას, პრორუსული პატრიოტთა ალიანსის ლიდერები — ირმა ინაშვილი და დავით თარხან-მოურავი ამბობენ, მედიასაშუალებებიდან შეიტყვეს, რომ ხატი, რომელიც მათ სამებას შესწირეს, დღეს ტაძარში აღარ არის.

"ინფორმირებულები არ ვიყავით, თუმცა, არც უნდა ვყოფილიყავით, რადგან ეს ჩვენ აღარ გვეხება", — თქვა ინაშვილმა.

პრორუსული პარტიის ლიდერების მიხედვით,

  • ხატი, ამჟამად, სახელოსნოშია გადატანილი "შესაბამისი სამუშაოებისთვის".
  • "ცვლილების შედეგად, ხატზე გამოსახული სტალინის ფიგურა, დიდი ალბათობით, ჩანაცვლდება მატრონა მოსკოველის მიერ, სიმსივნისგან განკურნებული ქალის ფიგურით", — თქვა თარხან-მოურავმა On.ge-სთან. "მე, პირადად, მივიჩვნევ, რომ ხატზე არაფერია შეცდომა და შესასწორებელი, ხატის გარშემო დატრიალებული ამბები კი — თითიდან გამოწოვილი აჟიოტაჟია", — ამბობს ის.
  • თარხან-მოურავის თქმით, რამდენიმე დღის წინ თავად დააკავშირა საპატრიაქრო ხატმწერთან, რომელმაც მატრონა მოსკოველის ხატი შექმნა.
  • შემწირველებს, საპატრიარქომ 11 იანვარს მოუწოდა, ხატი "ჩაასწორონ".

თარხან მოურავი ამბობს, რომ ხატზე სტალინის გამოსახვა შეცდომა არ იყო. მისი თქმით, რელიგიაში ამ სცენას ჰქვია "ღმერთი მოსკდრეკს ყველა ხელმწიფეს, მათ შორის, იმ ხელმწიფეს, რომელიც ღმერთს ებრძვის."

  • მისი თქმით, ხატზე გამოსახული სცენა თავის დროზე ხატმწერმა თავადვე შეარჩია. "ჩვენ ხატს ვიცავთ და არა — სტალინს და წინააღმდეგი ვართ, რომ ვიღაცა ხატს საღებავს ასხამდეს", — ამბობს პრორუსული პარტიის, პატრიოტთა ალიანსის თავმჯდომარე.

ბოლო ხაზი: On.ge ეცადა, დაკავშირებოდა საპატრიაქროს საზოგადოებასთან ურთიერთობის სამსახურის უფროსს, ანდრია ჯაღმაიძეს, და ასევე, სამების საკათედრო ტაძრის არქიმანდრიტ იოვანე მჭედლიშვილს, თუმცა, არცერთი მათგანი ჩვენს კითხვებს არ პასუხობს.

განახლება: რამდენიმე წუთის წინ არქიმანდრიტმა იოანე მჭედლიშვილმა ფეისბუქზე დაწერა, რომ "ხატწერის კანონიკის შესაბამისი ცვლილებების შეტანისთვის წმინდა მატრონას ხატი გადაბრძანებულია სამების ტაძრის დაცულ სივრცეში, სადაც ხატმწერს მიეცემა შესაძლებლობა საპატრიარქოს შესაბამის სამსახურებთან შეთანხმებით კანონიკური წესების დაცვით შეასწოროს ხატზე არსებული ხარვეზები. საკათედრო ტაძარში განთავსდა წმინდა მატრონას სხვა ხატი, რომლის მოლოცვაც შეუძლია მსურველთ."

ამ თემაზე: როცა ნატა ფერაძეზე ვსაუბრობთ, ნიშნავს, ვსაუბრობთ სიტყვისა და გამოხატვის თავისუფლებაზე. აი, რატომ