რა ხდება: პრორუსული პოლიტიკური პარტიის, პატრიოტთა ალიანსისა და პრორუსული, ძალადობრივი, ჰომოფობიური კონსერვატიული მოძრაობის მიერ ორგანიზებულ შეკრებაზე, საქართველოს პარლამენტის წინ, თქვეს, რომ აქციის შემადგენლობა გადაინაცვლებს სამების საკათედრო ტაძარში, სადაც პრორუსი ირმა ინაშვილის მიერ შეწირული სტალინისა და მატრონა მოსკოველის ხატია განთავსებული.

  • ამბობენ, რომ მიდიან, რათა მატრონა მოსკოველს თაყვანი სცენ.

ზურა მახარაძე, პრორუსი, ძალადობრივი კონსერვატიული მოძრაობის ერთ-ერთი ლიდერი: "წავალთ სამებაში იმ ხატთან, რომელიც ასე შეურაცხყვეს, რომელსაც ასე უსამართლოდ მოექცნენ. ყველანი მივალთ და თაყვანს ვცემთ, იმიტომ რომ ჩვენთვის ეგ სიწმინდეა."

  • ისინი მატრონა მოსკოველის ხატს მოიხსენიებენ, როგორც "ქართულ ხატს."

ირმა ინაშვილი, პრორუსი, პარტია პატრიოტთა ალიანსი: "ეს არის ქართული ხატი, ხატი დაიწერა საქართველოში, დაწერა ქართველმა ხატმწერმა, რომელიც არის მაზიარებელი და აღმსარებელი მანდილოსანი, ცხოვრობს მონაზვნური ცხოვრებით. ეს ხატი 2018 წლიდან იწერებოდა და არაერთ სამღვდელო პირს აქვს ეს ხატი ნანახი."

მუქარა ნატა ფერაძის მიმართ: აქციაზე ისმის ძალადობრივი, მუქარის შემცველი მოწოდება აქტივისტის, ნატა ფერაძის მიმართ, რომ თუ სახელმწიფო არ მიხედავს, "თავად მიხედავენ."

ისინი მოითხოვენ აქტივისტის, ნატა ფერაძის პასუხისგებას სისხლის სამართლის კოდექსის 155-ე მუხლის მიხედვით, რაც 2-წლამდე პატიმრობასაც გულისხმობს.

დეტალები: სისხლის სამართლის კოდექსის 155-ე მუხლი რელიგიური წესის აღსრულებისათვის უკანონოდ ხელის შეშლას შეეხება. კონკრეტულად,

1. ღვთისმსახურების ან სხვა რელიგიური წესისა თუ ჩვეულების აღსრულებისათვის უკანონოდ ხელის შეშლა, ჩადენილი ძალადობით ან ძალადობის მუქარით, ანდა თუ მას ახლდა მორწმუნის ან ღვთისმსახურის რელიგიური გრძნობის შეურაცხყოფა, — ისჯება ჯარიმით ან გამასწორებელი სამუშაოთი ვადით ერთ წლამდე ან შინაპატიმრობით ვადით ექვსი თვიდან ერთ წლამდე ანდა თავისუფლების აღკვეთით ვადით ორ წლამდე.

2. იგივე ქმედება, ჩადენილი სამსახურებრივი მდგომარეობის გამოყენებით, — ისჯება ჯარიმით ან შინაპატიმრობით ვადით ერთიდან ორ წლამდე ანდა თავისუფლების აღკვეთით ვადით ერთიდან ხუთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ

  • On.ge-მ შეკრებილთა შემადგენლობაში ძალადობრივი კონსერვატიული მოძრაობის რეგიონებიდან ჩამოსული არაერთი შემადგენლობა ამოიცნო.
  • აქციაზე გასვლისკენ მოწოდებები ისმოდა კრემლისტურ, პროპაგანდისტულ ქართულ ტელეარხზე, ალტ-ინფოზე, სადაც პრორუსული მოძრაობის ლიდერებთან ერთად, სასულიერო პირები მიმართავდნენ.