ამერიკელი პოპვარსკვლავი ტეილორ სვიფტი ბოლო დროის ერთ-ერთი ყველაზე ცნობადი ფიგურაა, ვისი გავლენაც მუსიკის ინდუსტრიას დიდი ხანია, გაცდა. მაგალითად, ცოტა ხნის წინ ევროკომისიის ვიცე-პრეზიდენტმა, მარგარიტის შინასმა ტეილორს ევროპარლამენტის არჩევნებისთვის ახალგაზრდების მობილიზებაში სთხოვა დახმარება.

ევროპარლამენტის არჩევნები 2024 წლის 6-9 ივნისს ჩატარდება და შინასის თქმით, ახალგაზრდების აქტიურობა ძალიან მნიშვნელოვანია. შინასის აზრით, ახალგაზრდების მოტივირება სხვა ახალგაზრდებს შეუძლიათ, რის მაგალითადაც ტეილორ სვიფტი მოიყვანა.

///

"მაგალითისთვის, წინა სექტემბერში ტეილორ სვიფტმა სოციალურ ქსელებში ახალგაზრდა ამერიკელებს ხმის მისაცემად რეგისტრაციისკენ მოუწოდა. დაპოსტვიდან ერთ დღეში 35 000 ახალგაზრდა დარეგისტრირდა".

მაისიდან ტეილორ სვიფტი ტურნეს ევროპაში დაიწყებს. შინასის თქმით, ეს შესანიშნავი შესაძლებლობაა იმისთვის, რომ ტეილორმა ახალგაზრდა ევროპელ ამომრჩევლებსაც მიმართოს.

"ტეილორ სვიფტი მაისში ევროპაში იქნება. დიდი იმედი მაქვს, ის ევროპელი ახალგაზრდებისთვისაც იმავეს გააკეთებს და იმის იმედიც მაქვს, რომ მისი გუნდიდან ვინმე ამ პრესკონფერენციას თვალს ადევნებს და ჩვენს თხოვნას გადასცემს", — განაცხადა შინასმა.

///

2019 წელს ევროპარლამენტის არჩევნებში მონაწილეობა ამომრჩევლების მხოლოდ 50,66%-მა მიიღო. წელს, აქტიურობის გასაზრდელად, ბელგია, ავსტრია, გერმანია და მალტა არჩევნებში ხმის მიცემის უფლებას ახალგაზრდებს 16 წლიდან მისცემენ.