ოქროს გლობუსი 2024-ის დაჯილდოების ცერემონიას სხვა ვარსკვლავებთან ერთად მსახიობი რიზ უიზერსპუნიც ესწრებოდა. რა თქმა უნდა, ერთ-ერთი მთავარი კითხვა, რომელიც ჟურნალისტებს მსახიობთან ჰქონდა, ცნობილი სერიალის, Big Little Lies-ის (დიდი პატარა ტყუილები) მე-3 სეზონი იყო. უიზერსპუნმა დაადასტურა, რომ მე-3 სეზონზე უკვე აქტიურად მუშაობს და ჩვენი საყვარელი სერიალი ნამდვილად დაგვიბრუნდება.

Big Little Lies-ის მე-3 სეზონი თავდაპირველად მსახიობმა ნიკოლ კიდმანმა ფანებთან შეხვედრისას დააანონსა:

"დიდი პატარა ტყუილები მიყვარდა. [ეს პროექტი] ჩემს ცხოვრებაში მაშინ გამოჩნდა, როცა უკვე შვილები მყავდა და კარიერის დასრულებაზე ვფიქრობდი. თუმცა, მერე მე და რიზ უიზერსპუნს ამ სერიალის შექმნის შესაძლებლობა მოგვეცა. შემდეგ თქვენ ის ნახეთ და ასეთი წარმატებული გახადეთ. ჩვენ კი, რომ იცოდეთ, მესამით დაგიბრუნდებით", — განაცხადა მან.

ჯერჯერობით, სერიალთან დაკავშირებული სხვა დეტალები და გამოსვლის თარიღი უცნობია.

მინისერიალად ჩაფიქრებული დიდი პატარა ტყუილები, ვარსკვლავური სამსახიობო შემადგენლობის — რიზ უიზერსპუნის, ნიკოლ კიდმანის, შეილინ ვუდლის, ლორა დერნისა და ზოი კრავიცის — მონაწილეობით, 2017 წელს იხილა მაყურებელმა. 2019 წელს გამოსულ მეორე სეზონში სერიალს მერილ სტრიპიც შეუერთდა. პრესტიჟული ჯილდოებით დახუნძლულ შოუს მილიონობით მაყურებლის აღფრთოვანებული გამოხმაურებაც ხვდა წილად.

///

ბოლო ოთხი წლის განმავლობაში ბევრჯერ ყოფილა საუბარი სერიალის გაგრძელებაზე. თავად კიდმანმაც აღნიშნა 2020 წელს, რომ მე-3 სეზონის გადაღება განიხილებოდა. თუმცა, მას შემდეგ სერიალის შემოქმედებით გუნდს რეჟისორი გამოაკლდა — ჟან-მარკ ვალე 2021 წლის დეკემბერში გარდაიცვალა. ამის გამო, ზოი კრავიცს ეეჭვებოდა, რომ დიდი პატარა ტყუილები გაგრძელდებოდა.

"არ მგონია, რომ სერიალი დაბრუნდეს", — განაცხადა მსახიობმა ტიკტოკზე შარშან, — "მესამე სეზონის გადაღებაზე ბევრს ვლაპარაკობდით, მაგრამ, სამწუხაროდ, ჟან-მარკ ვალე, ჩვენი შესანიშნავი რეჟისორი, გასულ წელს დაიღუპა, მე კი მის გარეშე გაგრძელება ვერც წარმომიდგენია".

Big Little Lies ავსტრალიელი მწერლის, ლიან მორიარტის, 2014 წელს გამოცემულ ამავე სახელწოდების რომანს ეფუძნება. წიგნი ათობით ენაზეა თარგმნილი, მათ შორის ქართულად. ბესტსელერად ქცეული ნაწარმოების ეკრანიზაციის უფლების მოპოვებაზე ნამდვილი ომი იყო გაჩაღებული, რომელიც, საბოლოოდ, ნეტფლიქსმა წააგო, სცენარი კი HBO-ის ხელში აღმოჩნდა.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…