გუშინ ამერიკის სატელევიზიო აკადემიამ ემის ნომინანტები დაასახელა, რომელიც ბევრმა უკვე შერაცხა, როგორც ყველაზე კონკურენტუნარიანი დაჯილდოება ემის ისტორიაში.

დრამატული სერიალის კატეგორიაში რომ დიდი კონკურენცია იქნებოდა ეს ყველასთვის თავიდანვე ნათელი იყო, აქ ერთმანეთ Better Call Saul, The Crown, The Handmaid's Tale, House of Cards, Stranger Things, This Is Us და Westworld დაუპირისპირდებიან.

აუცილებლად უნდა აღინიშნოს ქალი მსახიობების ნომინაციაც, სადაც ერთმანეთის კონკურენტები ნიკოლ კიდმანი, რიზ უიზერსპუნი, სუზან სარანდონი, ჯესიკა ლენგი და კლერ ფოი იქნებიან.

გთავაზობთ მსახიობების პირველ კომენტარებს, რომლებიც მათ გავლენიან გამოცემა Variety-ის მისცეს.

ნიკოლ კიდმანი, სერიალისთვის Big Little Lies

"ძალიან გამამართლა და შესანიშნავ გუნდთან აღმოვჩნდი. სცენარისტები, რეჟისორი, პარტნიორები, ყველა არაჩვეულებრივი, ერთმანეთზე უკეთესი ადამიანები და პროფესიონალები არიან. ძალიან გახარებული ვარ ამ ნომინაციით, ვულოცავ ჩემს კოლეგებსაც და ვეტყვი, რომ დიახ, ჩვენ ეს შევძელით".

მილი ბობი ბრაუნი, სერიალისთვის Stranger Things

"ეს არაჩვეულებრივი და გადასარევი ამბავია ჩემთვის. გასული წლის ემიზე მე და ჩემი კოლეგები ძალიან კარგად გავერთეთ. ძალიან ბედნიერები ვართ, ეს ნომინაცია ჩემთვის ბევრს ნიშნავს და მიხარია ისიც, რომ მხოლოდ მე არ ვარ ნომინირებული, ჩვენ ყველა ერთმანეთს ვუზიარებთ დიდ წარმატებას".

ევან რეიჩელ ვუდი, სერიალისთვის Westworld

"ჩვენ ყველას ძალიან გვიყვარს ეს შოუ და გვჯეროდა, რომ ასეც იქნებოდა. ყოველთვის აღფრთოვანებული ვიყავი ჩემი პერსონაჟით და სიმართლე გითხრათ იმედიც კი მქონდა, რომ ნომინაციას მივიღებდი. მადლობა ყველას, ვინც მენდო და ასეთი საპასუხისმგებლო დავალება მომცა".

კლერ ფოი, სერიალისთვის The Crown

"ძალიან მოულოდნელი იყო ჩემთვის და ემოციებს ვერ ვმალავდი. ვულოცავ ჩემს თავსაც და პირველ რიგში მთელს შემოქმედებით გუნდს, რომლებმაც ასეთი სერიალი შექმნეს"

ჯესიკა ლენგი, სერიალისთვის Feud

"ძალიან ბედნიერი ვარ ამ ყველაფრის გამო, რადგან ჯოანი [ჯოან კროუფორდი] ჩემთვის ძალიან ბევრს ნიშნავდა და უდიდესი ბედნიერება იყო მისი როლის შესრულება. ბევრი რამე არ ვიცოდი და ამ სერიალმა საშუალება მომცა, უფრო მეტი გამეგო ამ არაჩვეულებრივი, გენიალური ქალის შესახებ. ამ ამბავში კი ყველაზე დიდი წვლილი სცენარის ავტორს მიუძღვის, რომელმაც არაჩვეულებრივი პერსონაჟი შექმნა და მისი განსახიერების საშუალება მე მომცა".

ელიზაბეტ მოსი, სერიალისთვის The Handmaid's Tale

"დიდი მადლობა მინდა ვუთხრა ყველა იმ ადამიანს, რომელსაც სულ მცირე წვლილი მაინც მიუძღვის ამ სერიალის შექმნაში. არაჩვეულებრივი იყო მათთან ერთად მუშაობა, მიუხედავად იმისა, რომ ხშირად ყოფილა შემთხვევები, რომ გადაბმულად რამდენიმე დღეც კი არ გვეძინა. თუმცა საბოლოოდ ეს ყველაფერი დაფასდა და მაყურებლის რეაქციაც შესაბამისი იყო. ძალიან ბედნიერი ვარ".

კევინ სპეისი, სერიალისთვის House of Cards

"თუ არ გიმართლებს, უნდა სცადო, სცადო, სცადო, სცადო, სცადო და სცადო რამდენჯერაც შეძლებ. შემდეგ კი შედეგიც მოდის".

Emmy-ს 69-ე დაჯილდოება 17 სექტემბერს გაიმართება და მას სტივენ კოლბერტი გაუძღვება.