არხის გუნდის წარმომადგენელმა რადიო თავისუფლებას განუცხადა, რომ უსაფრთხოების ძალები მივიდნენ მათი ნათესავების სახლებში და მამების, ძმების და მამრობითი სქესის ბიძაშვილების მოკვლით დაემუქრნენ.

NIYSO ანტისამთავრობო ტელეგრამარხია, რომელიც აშუქებს ჩეჩნეთის მოვლენებს და ხშირად აკრიტიკებს რესპუბლიკის ხელმძღვანელს, რამზან კადიროვს.

წყაროს განცხადებით, მიუხედავად იმისა, რომ ადრეც ხდებოდა ხელისუფლებისადმი კრიტიკულად განწყობილი ტელეგრამარხების მფლობელების ნათესავებზე ზეწოლა, ინციდენტები კიდევ უფრო გააქტიურდა ჩეჩნეთის მთავრობის შეხვედრის შემდეგ, რომელიც დეკემბრის ბოლოს გაიმართა.

"ჩვენამდე მოვიდა ინფორმაცია, რომ [ჩეჩნეთის ხელისუფლებამ] შეხვედრა გამართა კონკრეტულად ჩვენს გუნდთან დაკავშირებით“, — ამბობენ NIYSO-ში. "ამ შეხვედრაზე გაცემული იქნა ბრძანება, რომ ნებისმიერი გზით გაენადგურებინათ ჩვენი გამოცემა, შეეჩერებინათ ჩვენი აქტივისტები, მათ ნათესავებზე ზეწოლის საშუალებით".

ამ მოვლენებს წინ უძღოდა დეკემბრის ბოლოს ჩეჩნეთის მეთაურის, რამზან კადიროვის მიერ დადებული პირობა, რომ გაანადგურებდა კრიტიკოსებს სოციალურ მედიაში, რომლებიც, მისი თქმით, "ექსტრემისტულ და ტერორისტულ პროპაგანდას" ავრცელებენ.

30 დეკემბერს ჩეჩნეთის შინაგან საქმეთა სამინისტროსა და ეროვნული გვარდიის მაღალჩინოსნებთან შეხვედრის შემდეგ, კადიროვმა თქვა, რომ მიმდინარეობდა "ახალგაზრდების წახალისება სერიოზული დანაშაულის ჩადენისთვის, უცხოეთიდან ადმინისტრირებული რამდენიმე სოციალური ქსელის პლატფორმაზე“.

"ხაზგასმით აღვნიშნე, რომ ადამიანის სიცოცხლეზე თავდასხმის ნებისმიერ მცდელობას გავლენა ექნება მოძალადის ნათესავებზეც“, - დაწერა კადიროვმა ტელეგრამის საკუთარ არხზე.

ჩეჩნეთის ტელეგრამის არხების უმეტესობა, რომლებიც ხელისუფლებას აკრიტიკებდნენ, მათ შორის, ყველაზე ცნობილი 1ADAT და NIYSO, იმართება ჩეჩნების მიერ, რომლებიც საზღვარგარეთ ცხოვრობენ. ისინი მუშაობენ ოპოზიციურ ბლოგერებთან ერთად, რომლებიც, ასევე, სხვა ქვეყნებში ცხოვრობენ.

კადიროვი მისი კრიტიკოსების ნათესავებს ღიად დაემუქრა.

"ახლო ნათესავებმა უნდა იცოდნენ, რას აკეთებს მათი ოჯახის წარმომადგენელი და აიღონ პასუხისმგებლობა მათზე, როგორც ჩეჩნური წესები საუკუნეების მანძილზე გვასწავლიდა“, - წერს ის.

რადიო თავისუფლების ცნობით, კადიროვი ასევე ღიად დაემუქრა თავის საზღვარგარეთ მცხოვრებ კრიტიკოსებს.

"ჩვენ არ დავინდობთ არავის, ვინც ცდილობს ჩეჩნეთში რაიმეს ორგანიზებას. რა ერშიც არ უნდა იყოს ის, ჩვენ გავგზავნით თხოვნას ტერორისტის ექსტრადიციის შესახებ. თუ არ გადმოგვცემენ, მაშინ ჩვენ უნდა მოვიშოროთ იგი, როგორც შეგვიძლია”, — თქვა მან. ”ისინი საუბრობენ ჩვენზე, იღებენ ფილმებს ჩვენზე, ამბობენ რაც უნდათ — ჩვენ ეს ასე არ უნდა დავტოვოთ".

საზღვარგარეთ არაერთი ჩეჩენი დისიდენტი მოკლეს. გერმანიის სასამართლომ რუსეთი "სახელმწიფო ტერორიზმში" დაადანაშაულა მას შემდეგ, რაც ბერლინში, 2019 წელს მოკლეს ზელიმხან ხანგოშვილი.

კადიროვმა ასევე მოუწოდა ჩეჩნეთში მცხოვრებ ყველა პირს, ვინც არ ეთანხმება მთავრობის "ხედვას“, "დატოვოს რესპუბლიკა“.

ოპოზიციური ბლოგერების დაშინება, მათი ახლობლების მეშვეობით, ადრეც ხდებოდა. 2023 წლის აგვისტოში ცნობილი ოპოზიციონერის, ახმედ ზაკაევის ძმისშვილი უკრაინაში საბრძოლველად გაგზავნეს.

იგივე მოხდა ძმები იანგულბაევების ნათესავებთან, რომლებიც მართავენ ოპოზიციურ ტელეგრამის არხს 1ADAT, ასევე, ბლოგერის ხასან ხალიტოვის ძმის შემთხვევაში.

ასევე, ნათესავებს აიძულებენ, საჯაროდ დაგმონ ოპოზიციურად განწყობილი აქტივისტები. 2022 წლის თებერვალში, კელოის კლანის წარმომადგენლებმა, რომელსაც ძმები იანგულბაევები ეკუთვნიან, გაავრცელეს ვიდეოჩანაწერი, სადაც მათ ძმები უარყვეს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.