"ბექა გრიგორიადისმა, პროტესტის ნიშნად, განაჩენის გამოცხადების მომენტში მუცელი გამოიფატრა, მისი მდგომარეობა არის საკმაოდ მძიმე, — უთხრა On.ge-ს ლაშა შუკაკიძემ, ბექა გრიგორიადისის ადვოკატმა.

  • დღეს, 15 დეკემბერს, მოსამართლემ მას 8-დღიანი ადმინისტრაციული პატიმრობა შეუფარდა 26 ნოემბერს მომხდარი ინციდენტის გამო.
  • მოსამართლის გადაწყვეტილების მიმართ პროტესტის ნიშნად, გრიგორიადისმა სასამართლო დარბაზში თვითდაზიანებები მიიყენა.

დეტალები: შუკაკიძე ამბობს, რომ მისი დაცვის ქვეშ მყოფს პოლიტიკურად მუდმივად დევნიან და სხვადასხვა თემაზე ხშირად ასამართლებენ.

  • ამჯერად კი საქმე ეხება რესტორანში მომხდარ ინციდენტს, სადაც, ადვოკატის თქმით, გრიგორიადისს დაცვის თანამშრომელმა სიტყვიერი და ფიზიკური შეურაცხყოფა მიაყენა:
  • "ჩემი დაცვის ქვეშ მყოფმა მას პასუხი გასცა და გრიგორიადისი დააკავეს ტყუილად, ხოლო რაც შეეხება მეორე მხარეს, ისინი გაუშვეს [დაცვის თანამშრომლები]."

ბექა გრიგორიადისი არის რუსული კანონის საწინააღმდეგო აქციის მონაწილის, ლაზარე გრიგორიადისის მამა. ლაზარე გრიგორიადისი პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.