რა ხდება: აშშ-ის პრეზიდენტის, ჯო ბაიდენის თქმით, იმის გამო, რომ ისრაელი ღაზაში ბომბავს ყველაფერს, განურჩევლად, ის კარგავს გლობალურ მხარდაჭერას.

  • ეს იყო ბაიდენის ყველაზე კრიტიკული განცხადება, რაც კი მას ისრაელის მიმართ ოდესმე გაუკეთებია.
  • 7 ოქტომბრის ჰამასის თავდასხმების შემდეგ, ბაიდენი ისრაელს მუდმივად უცხადებდა საჯარო მხარდაჭერას.

დეტალები: ამჯერადაც, აშშ-ის პრეზიდენტმა თქვა, რომ ისრაელს უნდა ჰქონდეს მათი მხარდაჭერის იმედი, თუმცა აქვე ისრაელის მთავრობას მიმართა:

  • "ისრაელის უსაფრთხოება შეიძლება დაეყრდნოს შეერთებულ შტატებს, მაგრამ ახლა მას უფრო მეტი მხარდამჭერი ჰყავს, ვიდრე შეერთებულ შტატებია — მას ჰყავს ევროკავშირი, ევროპა, მსოფლიოს უმეტესი ნაწილი. თუმცა ისრაელი ნელ-ნელა ჰკარგავს ამ მხარდაჭერას იმ მასობრივი დაბომბვის გამო, რასაც ახლა აქვს ადგილი", — თქვა მან.
  • ბაიდენმა, ასევე, აღნიშნა, რომ ჰამასის წინააღმდეგ ბრძოლის აუცილებლობასთან დაკავშირებით არანაირი კითხვის ნიშანი არ დგას და ამ ბრძოლისთვის ისრაელს სრული უფლება აქვს.

რა ვითარებაა ღაზაში: პალესტინის ჯანდაცვის სამინისტროს ინფორმაციით, ისრაელის თავდასხმებისას 50 ათასზე მეტი ადამიანი დაშავდა, დაღუპულთა რაოდენობა კი 18 400-ს აჭარბებს.

  • საერთაშორისო ჰუმანიტარული ორგანიზაციები ამბობენ, რომ ასაფეთქებელი იარაღის გამოყენების შედეგად, ადამიანებს აქვთ დამწვრობები, ტვინის ტრავმული დაზიანებები, დაკარგეს კიდურები. იმის გამო, რომ ღაზის სექტორში არ არის მედიკამენტების და ტკივილგამაყუჩებელი საშუალებების საჭირო რაოდენობა, ადამიანებს უწევთ ძლიერი ტკივილის ატანა.
  • ჯერჯერობით, მხოლოდ 400 დაშავებულის გადაყვანა მოხერხდა საზღვარგარეთ.