რა ხდება: ბათუმის სანაპიროზე თითქმის 8-ბალიანი შტორმია.

  • რადიო თავისუფლების ინფორმაციით, ვიცე-მერმა, ლევან დავითაძემ თქვა, რომ დაზიანებულია ბულვარის ინფრასტრუქტურა, დატბორილია საფეხმავლო ნაწილი და ნინოშვილის ქუჩა.

უამინდობის შესახებ მოსახლეობას აფრთხილებენ: საგანგებო სიტუაციების მართვის სამსახური შტორმისა და უამინდობის გამო, მოსახლეობას, განსაკუთრებით — ზღვისპირა რეგიონებში მყოფ მოქალაქეებს, მოუწოდებს, თავი შეიკავონ სანაპირო ზოლთან გადაადგილებისგან.

  • "საქართველოს სხვადასხვა რეგიონში ძლიერი ქარის, უხვი ნალექისა და შტორმის გამო, შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველები, საპატრულო პოლიციის დეპარტამენტისა და კრიმინალური პოლიციის დეპარტამენტის თანამშრომლები მობილიზებული არიან ადგილობრივი მუნიციპალიტეტების წარმომადგენლებთან ერთად და კომპეტენციის ფარგლებში ახორციელებენ შესაბამის სამუშაოებს", — ნათქვამია უწყების მიერ გავრცელებულ განცხადებაში.

ამინდის გაუარესების შესახებ ინფორმაცია გარემოს ეროვნულმა სააგენტომაც გაავრცელა.

  • სინოპტიკოსები ვარაუდობენ, რომ 27 ნოემბრიდან 28 ნოემბრამდე, საქართველოში მოსალოდნელია წვიმა, მაღალმთიან რეგიონებში თოვლი, ზოგან ძლიერი, ქარბუქი,შესაძლებელია თოვლის ზვავები, დასავლეთის მიმართულების ძლიერი ქარი, ზღვაზე 5-6 ბალიანი შტორმი.
  • "მოსალოდნელმა ნალექებმა საქართველოს მდინარეებზე შესაძლებელია წყლის დონეების მნიშვნელოვანი მატება, ხოლო გორაკ-ბორცვიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს", — ნათქვამია გარემოს ეროვნული სააგენტოს განცხადებაში.