STORI ქართული სტარტაპია, რომელიც ხელოვნური ინტელექტის დახმარებით კომპანიებს კონტენტის შექმნაში, მის გამოქვეყნებასა და სამიზნე აუდიტორიამდე მიტანაში ეხმარება. როგორც დამფუძნებლები ამბობენ, სტარტაპი ჯერ კიდევ იქამდე იყენებდა ხელოვნურ ინტელექტს, სანამ ChatGPT პოპულარული გახდებოდა.

STORI-ის ხელოვნურ ინტელექტს აქვს შესაძლებლობა მთელი მარკეტინგის გუნდი წამებში ჩაანაცვლოს, ამისათვის მხოლოდ პლატფორმაზე დარეგისტრირება და მასზე კომპანიასთან დაკავშირებული ინფორმაციის განთავსებაა საჭირო. STORI-ს მომხმარებლები ძირითადად უცხოური კომპანიები არიან (მათგან 40% ამერიკის შეერთებული შტატებიდან). ვებგვერდზე ბიზნესებისთვის სერვისის სამი სხვადასხვა პაკეტია ხელმისაწვდომი.

STORI წელს 500 Georgia-ს აქსელერაციის პროგრამის 5 ქვეყნის 10 მონაწილეს შორისაა.

აქსელერაციის პროგრამაში მიღებული გამოცდილების, საკუთარი სტარტარტაპისა და სამომავლო მიზნების შესახებ STORI-ს თანადამფუძნებელს, სანდრო ოქროპირიძეს გავესაუბრეთ.

როგორ შეიკრა თქვენი გუნდი, რა არის თქვენი Origin STORI?

როცა პოლონეთიდან ჩამოვედი, შევამჩნიე, რომ საქართველოში ინტერნეტში თითქმის არაფერი იძებნებოდა. სტატისტიკურად, 2020 წელსაც კი, საქართველოში ბიზნესების 80%-ს ჯერ კიდევ არ ჰქონდა ვებგვერდი. ამიტომ, დავიწყეთ did.ge-ით, რომელიც ვებგვერდების no code low code პლატფორმა იყო და ეხმარებოდა მომხმარებელს უმოკლეს დროში, მხოლოდ საწევრო გადასახადით, მარტივად შეექმნა ვებგვერდი. მუშაობისას მივხვდით, რომ ბიზნესები საწევროს იხდიდნენ, თუმცა ვებგვერდის განახლებისთვის საჭირო კონტენტს ვერ გვაწვდიდნენ. პირველ ეტაპზე, გვეგონა კონტენტის ჩვენთვის მოწოდება იყო პრობლემატური ნაწილი, თუმცა გამოგზავნის სხვადასხვა ფორმის შედგენისა და დატესტვის შემდეგ, გავაცნობიერეთ, რომ წინაღობა კონტენტის არ არსებობა იყო – ბიზნესებს უბრალოდ არ ჰქონდათ მარკეტინგისთვის საჭირო მასალა. შესაბამისად, პლატფორმის ის ნაწილი, რომელიც ხელოვნური ინტელექტის მეშვეობით კონტენტს აწვდიდა მომხმარებელს, კიდევ უფრო გავაძლიერეთ და მთავარ მიმართულებად ვაქციეთ.

ჩემი გამოცდილება hardware სფეროს უკავშირდება, კომპანიის თანადამფუძნებელი, ნიკა ბუაჩიძე კი კორპორატიული სფეროდან გადმოვიდა სტარტაპერობის არასტაბილურ, თუმცა ძალიან საინტერესო გარემოში. ადრეულ ეტაპზევე შემოუერთდა დამფუძნებლების გუნდს ჩვენი დიზაინერი ირინა ბურძგლაც. STORI-ს CFO, გიორგი თედიაშვილი სტარტაპების ერთ-ერთ აქსელერატორზე გავიცანით, სხვა სტარტაპის წარმომადგენელი იყო, თუმცა მალევე გადმოვიბირეთ.

რატომ უნდა აირჩიოს ბიზნესმა STORI?

ყველგან, სადაც მიმუშავია მარკეტინგის პრობლემებს წავაწყდი: შეიძლება გუნდს ძალიან მაგარ პროდუქტზე დეტალურად ემუშავა, თუმცა ის სამიზნე აუდიტორიამდე ვერ მიჰქონდა. ჩემი დაკვირვებით, software კომპანიებს მსგავსი პრობლემა აქვთ – არ აქვთ უნარები კარგად წარმოაჩინონ ის, რაზეც მუშაობენ. სწორედ ამიტომ, ის სერვისი შევქმენით, რაც თავადვე გვჭირდებოდა და წარმატებით ვიყენებთ – პლატფორმა, რომელიც ერთ ფაქტს მარკეტინგულად ისე წარმოაჩენს, როგორც კომპანიას სჭირდება. იმის გარდა, რომ STORI ძალიან ადვილად გამოსაყენებელია, ის კოლაბორაციისთვისაა შექმნილი. მას შეუძლია გუნდში არსებული კომპეტენციის დანაკლისი ამოავსოს და შეითავსოს დიზაინერის, ქოფირაითერის ან სოციალური მედიის მენეჯერის საქმე. იმ მცირე და საშუალო ბიზნესებისთვის, რომელთაც არ ჰყავთ ჩამოყალიბებული მარკეტინგული გუნდი, უბრალო ფაქტის დაგენერირებიდან დასრულებული პროდუქტის მიღება (მაგალითად, სოციალური მედიის პოსტის), საჭირო განსაკუთრებული უნარების გარეშე, უმნიშვნელოვანესია. გვჯერა, რომ ყველა კარგ გუნდს შეუძლია სამყაროზე ზეგავლენა თუ თავის ამბავს მოჰყვება და მის აუდიტორიას სწორად დაუკავშირდება.

რა იყო 500 Georgia-მდე და რამ გადაგაწყვეტინათ აპლიკაციის ფორმის შევსება?

500 Georgia-მდე GITA-ს 150 000 ლარიანი გრანტი მოვიგეთ, გავხდით დღის და კვირის პროდუქტი ProductHunt-ზე. ProductHunt ის პლატფორმაა, სადაც მთელი მსოფლიოდან ეშვება ახალი პროდუქტები და ტექნოლოგიები – თავის დროზე, აქ ისეთი კომპანიები ჩაეშვნენ, როგორებიცაა Canva, ChatGPT, Notion, TikTok და ა.შ. სხვათა შორის, STORI ერთადერთი ქართული კომპანიაა, რომელმაც ProductHunt-ზე კვირის პროდუქტის სტატუსი მოიპოვა. ამავე პლატფორმაზე, მარკეტინგის კატეგორიაში, წლის საუკეთესო პროდუქტად ვართ წარდგენილი, გამარჯვებული იანვარში გამოვლინდება.

რაც შეეხება 500 Georgia-ს, მასში მონაწილეობა აქამდეც გვინდოდა, წინა ნაკადში ინტერვიუების ეტაპამდეც მივედით, თუმცა ჯერ კიდევ არ ვიყავით მზად აქსელერაციის პროგრამაში მონაწილეობის მისაღებად და რჩეულებში ვერ მოვხვდით. წელს კი ნატვრა ავისრულეთ.

რას ელით 500 Georgia-სგან?

სიმართლე გითხრათ, 500-მა მოლოდინებს უკვე გადააჭარბა! ხშირად, სტარტაპზე მუშაობისას შეიძლება უმცირეს დეტალებს უკირკიტებდე, ამ დროს კი უმნიშვნელოვანესი ასპექტები გამოგრჩეს – სწორედ ამის დანახვაში დაგვეხმარნენ 500 Georgia-ს მენტორები. მათ პროდუქტის განვითარების, ინვესტიციების მოზიდვის, ბაზარზე შესვლისა და კონტაქტების დამყარების სწორი სტრატეგიები გაგვიზიარეს. შედეგად, გუნდი ისეთ დეტალებზე არ დახარჯავს რესურსს, რაც არც არის საჭირო. გასული ორი კვირა იყო ძალიან ინტენსიური, მთელი დღეები ჩართული ვიყავით პროცესში, თითქმის არც კი გვძინებია დატვირთული გრაფიკის გამო.

ინფორმაციისთვის, საქართველოს ბანკის, GITA-ს და 500 Global-ის თანამშრომლობით, საქართველოში სტარტაპების გლობალური აქსელერაციის პროგრამა 500 Georgia-ს სახელით წელს უკვე მეხუთედ ხორციელდება. 12 კვირიანი, ინტენსიური პროგრამის ფარგლებში შერჩეული სტარტაპები საერთაშორისო დონის აქსელერაციის ექსპერტებთან ერთად მუშაობენ საკუთარი ბიზნესის სწრაფი ზრდის, განვითარებისა და ფონდების მოზიდვის სტრატეგიების შემუშავებაზე.