საქართველოს სახალხო დამცველს, უჩა ნანუაშვილის მიაჩნია, რომ საფინანსო კომპანია - საქართველოს დაზარალებულების შეკრების თავისუფლება დაირღვა, რადგან მათ არ მისცეს უფლება გამოეყენებინათ გასაშლელი საწოლი. ომბუდსმენმა ამის შესახებ დღეს, 11 ივლისს გავრცელებულ განცხადებაში, აპარატის მიერ ივნისსა და ივლისში აქციის მონიტორინგზე დაყრდნობით, ისაუბრა.

"[მთავრობის ადმინისტრაციასთან აქცია] აღნიშნული შემთხვევა, არ იწვევდა შენობის შესასვლელი ნაწილის ბლოკირებას, თუ ტრანსპორტის მოძრაობის შეფერხებას," - აღნიშნავს სახალხო დამცველი და დასძენს, რომ მსგავს შემთხვევაში დაუშვებელია შეკრების უფლების დარღვევა.

როგორც ნანუაშვილი ამბობს, შეკრების უფლება 2017 წლის 9 და 21 მარტსაც დაირღვა, როცა ბავშვთა სამყაროს ხანძრით დაზარალებულებს მთავრობის კანცელარიასთან არ მიეცათ კარვის დადგმის საშუალება. მისივე განმარტებით, ამ უფლების შეზღუდვის გამოძიების დასაწყებად შინაგან საქმეთა სამინისტროს მიმართა, თუმცა მათგან პასუხი არ მიუღია.

"სამართალდამცავი ორგანოების ამგვარი ქმედებები შეუთავსებელია შეკრების თავისუფლებასთან და მოუწოდებს შინაგან საქმეთა მინისტრს ერთი მხრივ უზრუნველყოს პოლიციის თანამშრომლების მიერ შეკრების თავისუფლების პატივისცემა და ამასთან, დროული რეაგირება მოახდინოს ყველა უკვე მომხდარი კანონდარღვევის ფაქტზე, რაც შეამცირებს მომავალში მათ გამეორებას," - მიაჩნია სახალხო დამცველს.