რა ხდება: ევროკავშირის სამხედრო დახმარების მისიის ფარგლებში, საფრანგეთი წელს 7 000 უკრაინელ ჯარისკაცს გაწვრთნის, ნაწილს პოლონეთში, ნაწილს კი — ფრანგულ ბაზებზე.

  • ევროკავშირის მისია ითვალისწინებდა 15 000 ჯარისკაცის მომზადებას, თუმცა დაგეგმილს გადააჭარბეს და სავარაუდოდ, ევროკავშირის ქვეყნების მიერ გაწვრთნილი უკრაინელების რაოდენობა, წლის ბოლოსთვის, 35 ათასს მიაღწევს.
  • 18 ათასამდე სამხედრო მოამზადა აშშ-მა, უმეტესად გერმანიაში.
  • იარაღის მოხმარების საბაზისო წვრთნების, ბრძოლის ველზე პირველადი დახმარებისა და სხვა უნარების მომზადებასთან ერთად, ინსტრუქტორები ასევე აძლევენ სპეციალიზებულ სამხედრო ცოდნას — მათ შორის, განაღმვას.

დახმარება გერმანიისგან: გერმანიის თავდაცვის მინისტრმა გუშინ განაცხადა, რომ უკრაინისთვის დაგეგმილი დახმარების თანხა გააორმაგეს და 2024 წელს ომში მყოფი ქვეყანა გერმანიისგან 8 მილიარდ ევროს მიიღებს.

"ეს არის ძლიერი სიგნალი უკრაინისთვის, რომ ჩვენ მათ დახმარებას არ ვწყვეტთ",— თქვა ბორის პისტორიუსმა.

როგორი იქნება ზამთარი უკრაინისთვის: პრეზიდენტი ვოლოდიმირ ზელენსკი ამბობს, რომ ქვეყანა მზად უნდა იყოს, ზამთრის პერიოდში, რუსული თავდასხმებისთვის ინფრასტრუქტურაზე.

  • "სავარაუდოდ, მტერი გაზრდის ჩვენს ინფრასტრუქტურაზე დრონებითა და რაკეტებით თავდასხმას",— თქვა ზელენსკიმ ყოველდღიურ მიმართვაში.
  • მისივე თქმით, მთელი ყურადღება თავდაცვაზე უნდა იყოს ფოკუსირებული და ასევე, იმაზე, თუ რა შეიძლება გააკეთოს ქვეყანამ, რომ ხალხმა ზამთარს გაუძლოს.
  • "უკრაინის საჰაერო თავდაცვა იქნება უფრო ძლიერი, ვიდრე გასულ წელს",— თქვა ზელენსკიმ.

შარშან, უკრაინის ენერგოსისტემის სისტემატური დაბომბვის შედეგად, ათასობით ადამიანი, ზამთრის ცივ პერიოდში, ელექტროენერგიისა და გათბობის გარეშე დარჩა.