საქართველოს პრეზიდენტი მოსახლეობას ხვალ, 20 საათზე ორბელიანების სასახლესთან შეკრებისკენ მოუწოდებს და ასევე, ხელმოწერების კამპანიას იწყებს.

  • ამის შესახებ სალომე ზურაბიშვილმა ბრიფინგზე განაცხადა.
  • ხვალ გახდება ცნობილი ევროკომისიის დასკვნაც, საქართველოსთვის კანდიდატის მინიჭების თაობაზე.

დეტალები: საქართველოს პრეზიდენტის თქმით, მის ადმინისტრაციას ხვალისთვის კონცერტი ჰქონდა დაგეგმილი, თუმცა სოფელ კირბალთან, ოკუპანტების მიერ საქართველოს მოქალაქის მკვლელობის გამო, გეგმა შეიცვალა.

  • "რადგან, რუსეთმა სცადა კიდევ შეგვიცვალოს ჩვენი დღის წესრიგი და ჩვენ მართლაც, მიგვაჩნია, რომ არ შეიძლება არანაირი კონცერტი, შევცვალეთ ხვალინდელი ღონისძიების სახე, მაგრამ არა მისი არსი, ჩვენ ხვალ შევიკრიბებით და კიდევ ერთხელ ვიტყვით, რომ ჩვენი მომავალი არ არის რუსეთში და ჩვენ გვექნება დიდი გზავნილი ევროპისკენ, გავაგზავნით ევროპაში ჩვენს ხმას - შენს ხმას, ყველანი ინდივიდუალურად და ყველანი ერთად, აქ ყველანი უნდა ვიყოთ და ვიდგეთ," - თქვა პრეზიდენტმა.
  • სალომე ზურაბიშვილის თქმით, ხვალვე დაიწყება ხელმოწერების კამპანია და ამაში საზოგადოების ყველა ნაწილი იქნება ჩართული.
  • პრეზიდენტის განმარტებით, ეს უნდა იყოს ერთიანი, დიდი ინიციატივა, "დიდი მობილიზაცია, დიდი აქტიურობა და ხვალ იქნება ამ დღის საწყისი".

რას ველოდებით ხვალ: საქართველოსთვის ევროკავშირის წევრობის კანდიდატის სტატუსის მინიჭების შესახებ ლიდერებმა საბოლოო გადაწყვეტილება დეკემბერში უნდა მიიღონ, თუმცა ხვალ ევროკომისია, გაფართოების შესახებ ყოველწლიურ მოხსენებას გამოაქვეყნებს და გადაწყვეტილებაც, დიდწილად, ამ შეფასებებს დაეფუძნება.

  • დოკუმენტი, რომელიც ევროკომისიამ 8 ნოემბერს უნდა გამოაქვეყნოს, არაერთ ქვეყანას შეეხება. შეფასებებს საქართველოსთან ერთად, ელოდებიან: ალბანეთი, ბოსნია-ჰერცეგოვინა, თურქეთი, კოსოვო, მოლდოვა, მონტენეგრო, სერბეთი, უკრაინა და ჩრდილოეთ მაკედონია.