პირველადი მონაცემებით, 10 ივლის, გამთენიისას ფოთის ბაზრობაზე გაჩენილი ხანძრის შედეგად 500 კვ.მ დაიწვა. ხანძრის შედეგად არავინ დაშავებულა, დაიწვა მაღაზიები და დახლები. ამ ეტაპზე ხანძარი ლიკვიდირებულია. ამის შესახებ ინფორმაცია On.ge-ს საგანგებო სიტუაციების მართვის სამსახურში განუცხადეს.

მათი ინფორმაციით, ფოთის ბაზრობაზე გაჩენილი ხანძრის შესახებ ინფორმაცია დილის 7 საათისთვის მიიღეს და ადგილზე სახანძრო ავტომობილი ფოთიდან რამდენიმე წუთში მივიდა. როგორც უწყებაში განმარტავენ სახანძრო ავტომობილები ბაზრობაზე გაჩენილი ცეცხლის ჩასაქრობად სენაკიდან, ზუგდიდიდან, ხობიდან და ფოთის პორტიდან და ჯამში 9 სახანძრო ჯგუფი აქრობდა.

საქმეზე შინაგან საქმეთა სამინისტრომ სხვისი ნივთის დაზიანების (სსკ-ს 187-ე) მუხლით დაიწყო გამოძიება.

გასულ კვირას, 2 ივლისს ხანძარი თბილისში ელიავას ბაზრობასაც გაუჩდა. ამ შემთხვევაში დამწვარია დაახლოებით 2 500 კვ.მ. როგორც ელიავას ბაზრობაზე დასაქმებული ადამიანები ამბობენ ზარალი რამდენიმე ასეული ათასი ლარია.