საქართველოს შინაგან საქმეთა მინისტრმა, გიორგი მღებრიშვილმა, ბირჟა მაფიას კლიპზე და მისი წევრების დაკავებისას პოლიციელების მხრიდან მტკიცებულებების შესაძლო გაყალბებაზე იმედის კვირასთან ექსკლუზიური ინტერვიუს დროს ისაუბრა.

მღებრიშვილი აცხადებს, რომ ბირჟა მაფიას წევრების დაკავება მათ კლიპს არ უკავშირდება და პოლიციელები, რომელთა მხრიდანაც მტკიცებულებების შესაძლო გაყალბებას პროკურატურა იძიებს, სამინისტროში კვლავ მუშაობენ.

"მე ეს კლიპი არ მქონდა ნანახი და მხოლოდ მათი დაკავების შემდეგ ვნახე. მძიმე შთაბეჭდილება მოახდინა, ეს არ არის კონკრეტული პოლიციელის გაშარჟება, ესაა მთელი სისტემის დაკნინება, სირცხვილია მსგავსი კლიპების გადაღება, როცა დღეს და ღამეს ასწორებენ პოლიციელები ჩვენი უსაფრთხოებისთვის. ჩვენი პოლიციელები არაერთხელ ემსხვერპლნენ ამ უსაფრთხოების დაცვას. ძალიან ბევრს ვმუშაობთ, 24 საათი ვმუშაობთ, შეცდომებიც მოგვდის, მაგრამ ეს არ ნიშნავს იმას, რომ ვინმეს აქვს უფლება პოლიციელი დააჩოქოს, ყელზე ბაწარგამობმული ატაროს და პირში ძვალი ჩასჩაროს. სასტიკად არ მომეწონა ეს კლიპი".

ბირჟა მაფიას წევრებს, თბილისის საქალაქო სასამართლომ წინასწარი პატიმრობა 9 ივნისს შეუფარდა. 12 ივნისს სააპელაციო სასამართლომ რეპერებს პატიმრობა გირაოთი შეუცვალა და გიორგი ქებურიას 20, ხოლო მიშკა მგალობლიშვილს 50 ათასი ლარის გადახდა დააკისრა. მათ სამართალდამცავები დიდი ოდენობით ნარკოტიკული საშუალება MDMA-ს შეძენა-შენახვას ედავებიან. რეპერების თქმით, მათ ნარკოტიკი ჩაუდეს და რეალურად, მათზე შური იმ კლიპის გამო იძიეს, სადაც პოლიციელი გააშარჟეს. ბრალის დამტკიცების შემთხვევაში რეპერებს 8-დან 20 წლამდე ან უვადო თავისუფლების აღკვეთა ემუქრებათ.

რეპერების მხარდამჭერი აქციის, საქართველოს პრემიერ-მინისტრის, ენერგეტიკის მინისტრისა და ბერა ივანიშვილის განცხადებების შემდეგ, 11 ივნისს, პროკურატურამ განაცხადა, რომ მგალობლიშვილისა და ქებურიას პატიმრობას აღარ მოითხოვდა. ამავე განცხადებით ცნობილი გახდა, რომ პროკურატურამ სამართალდამცავების მხრიდან, ბირჟა მაფიას წევრების დაკავების დროს, მტკიცებულებების შესაძლო გაყალბებაზე გამოძიება დაიწყო.