ძლიერი წვიმების შემდეგ, დღეს, 7 ივლისს, მტკვარმა თბილისის ტერიტორიაზე დიდი ოდენობით ნაგავი ჩამოიტანა, რომლის ამსახველი ვიდეო კადრები ფეისბუქზე გიორგი რუხაიამ გაავრცელა:

თბილისის მერიის პრესსამსახურში On.ge-ს უთხრეს, რომ დაბინძურებული მტკვრის დასუფთავება მათი და თბილსერვის ჯგუფის ვალდებულება არ არის. მერიაში არც იმაზე აქვთ ინფორმაცია, თუ რომელი უწყების კომპეტენციაა მტკვრის გაწმენდა ნარჩენებისგან :

"ამ შემთხვევაში თბილისის მერია, სავარაუდოდ, აღარ დაასუფთავებს და ვერ გეტყვით, ვისი კომპეტენციაა ეს".

მერიაში აცხადებენ, რომ გაზაფხულზე, წვიმების სეზონზე, მერიამ "თავისი კეთილი ნებით", თბილსერვის ჯგუფის დახმარებით გაწმინდა მტკვრის კალაპოტი, თუმცა როგორც ამბობენ, ეს მათი ვალი არ იყო.

მერიაში ამბობენ, რომ მტკვარში დიდი რაოდენობითი ნაგავი ძლიერი წვიმების შედეგად აღმოჩნდა. ადიდებულმა წყალმა ნარჩენები მტკვარში ჩაიტანა და საბოლოოდ, თბილისამდე ჩამოიტანა.

თბილისის მერიის მსგავსად, გარემოს დაცვის სამინისტროც აცხადებს, რომ მტკვრის გაწმენდა მათი ვალდებულება არაა. სამინისტროში On.ge-ს უთხრეს, რომ მათი ვალდებულება ნარჩენების მართვის პოლიტიკის შემუშავებაა და არა - ნარჩენების მართვა.

უწყების განმარტებით, სამინისტროს სსიპ გარემოს ეროვნული სააგენტო კი, სპეციალური სინჯით განსაზღვრავს მხოლოდ მდინარის დაბინძურების ხარისხს.