ქართველმა მომღერალმა, ნინი ბრეგვაძემ, ამერიკული The Voice-ის შესარჩევი ტურისა და ბრმა კასტინგის შემდეგ ჟიური რინგის რაუნდშიც გააოცა. ნინი ბრეგვაძემ, რომელიც კონკურსში სასცენო სახელით Nini Iris მონაწილეობს, რინგის რაუნდში კონკურსანტ სოფია ჰოფმანს გაუწია კონკურენცია. კონკურსის მონაწილეებმა ცნობილი როკ ჯგუფის, Blondie-ის, სიმღერა Heart of Glass შეასრულეს და ჟიური საკმაოდ რთული გადაწყვეტილების წინაშეც დატოვეს.

შეგახსენებთ, რომ ბრმა კასტინგზე ნინიმ სიმღერის დაწყებიდან სულ რამდენიმე წამში ოთხივე მწვრთნელი შემოატრიალა, საბოლოოდ კი, ქართველმა მომღერალმა ნაილ ჰორანი აირჩია და სწორედ მის გუნდში გააგრძელა ბრძოლა. რინგის რაუნდში ნინისა და სოფიას შორის ნაილმა ნინი აირჩია, ასე რომ, The Voice-ში გამარჯვებისთვის ბრძოლას ქართველი კონკურსანტი აგრძელებს.

ნინი ბრეგვაძე საქართველოდან ნიუ-იორკში საცხოვრებლად და მუსიკალური კარიერის გასაგრძელებლად 2016 წელს გადავიდა. ნინიმ ქართველ მაყურებელს თავი X ფაქტორიდან დაამახსოვრა, როცა მომღერალი 2015 წელს X ფაქტორის მე-2 სეზონის ფინალისტი გახდა.

ნინის ამერიკული The Voice-ის შემდეგ რაუნდებში მაყურებელი მალე იხილავს. რაც შეეხება ბრმა კასტინგს, ნინიმ ჯგუფ Everybody Loves an Outlaw-ის ცნობილი სიმღერა I See Red შეასრულა, ჟიურიმ კი მას "პოტენციური გამარჯვებული" უწოდა.