ოკუპირებული აფხაზეთის ე.წ. უშიშროების საბჭოს მდივანი, სერგეი შამბა, ამბობს, რომ "აფხაზეთი რუსული სამყაროს ნაწილია".

რუსეთთან ისეთი ურთიერთობა გვაქვს, რომ მიუხედავად საბჭოთა საზოგადოების დანგრევისა, გრძნობები ჯერ კიდევ არსებობს. აფხაზი საზოგადოება რუსულ სამყაროზე არის მორგებული და და მონაწილეობს რუსული სამყაროს შექმნაში. ჩვენ გვინდა ვიყოთ და ვართ ამ სამყაროს ნაწილი

თქვა შამბამ მრგვალი მაგიდის მიმდინარეობისას, თემაზე — აფხაზეთისა და რუსეთის კულტურულ-სოციალური სივრცე.

მან, ასევე, განაცხადა, რომ აფხაზეთმა მსოფლიო კულტურა რუსული ენის წყალობით გაიცნო.

უნდა აღინიშნოს, რომ რუსულმა საზოგადოებამ, ასევე შეითვისა ბევრი ტრადიცია თუ კულტურული მომენტი და ეს გამდიდრება ორმხრივი იყო. დიადმა რუსულმა კულტურამ, რუსეთის იმპერიისა და საბჭოთა კავშირის დროს, დიდი გავლენა მოახდინა ბევრი ერის ფორმირებაზე. აფხაზეთი ყოველთვის იზიდავდა რუსი ინტელიგენციის ყურადღებას - მწერლების, მხატვრების და ა.შ.,

თქვა შამბამ.

მანამდე, აფხაზეთის ე.წ. საგარეო საქმეთა მინისტრმა, ინალ არძინბამ თქვა, რომ

  • "რუსეთთან ურთიერთობის ხელსაყრელი ფორმა შესაძლოა იყოს ასოცირებული სახელმწიფოს მოდელი - შენარჩუნებული იქნას დამოუკიდებლობა;
  • აფხაზეთი მზად არის, რუსეთთან ერთად ააგოს საკუთარი საგარეო და თავდაცვითი, ასევე — საზღვრის დაცვის პოლიტიკა."

ამ განცხადებას აფხაზურ საზოგადოებაში არაერთგვაროვანი რეაქცია მოჰყვა.

  • მაგალითად, აქტივისტი არხა ბჟანია ე.წ. მთავრობას მოუწოდებდა, რომ "თუ სუსტია, არ ჰყავს ჯარი და არ აქვს ფული, უნდა გადადგეს".