ყოფილმა პორნოვარსკვლავმა მია ხალიფამ ინტერნეტსივრცის ყურადღება კიდევ ერთხელ მიიქცია. ხალიფამ სოციალურ ქსელ X-ზე (ყოფილ ტვიტერზე) ისრაელში მიმდინარე კონფლიქტის შესახებ რამდენიმე პოსტი გამოაქვეყნა და თავდასხმაზე პასუხისმგებელ ჰამასს, რომელსაც არაერთი ქვეყანა ტერორისტულ დაჯგუფებად მიიჩნევს, მხარდამჭერი კომენტარები მიუძღვნა. განცხადებებს მომხმარებლების ნაწილის მხრიდან მწვავე კრიტიკა მოჰყვა.

"პალესტინის თავისუფლებისთვის მებრძოლებს იქნებ ვინმემ გადასცეთ, რომ ტელეფონი შემოატრიალონ და [ვიდეოები] ჰორიზონტალურად გადაიღონ", — დაწერა ყოფილმა პორნოვარსკვლავმა.

ამ განცხადების გამო ხალიფამ კანადელ რადიოწამყვან ტოდ შაპიროსთან გაფორმებული კონტრაქტიც დაკარგა.

"საშინელი განაცხადია, მია ხალიფა", — დაწერა შაპირომ, — "ჩათვალე, დათხოვნილი ხარ. უბრალოდ, ამაზრზენია. ამაზრზენზე უარესიც. გთხოვ, განვითარდი და უკეთეს ადამიანად ჩამოყალიბდი. გულის ამრევია, სიკვდილს, გაუპატიურებას, ძალადობასა და მძევლების აყვანას რომ იწყნარებ. სიტყვებით ვერ გადმოვცემ შენს უვიცობას. ადამიანებს ერთიანობა სჭირდებათ, განსაკუთრებით ტრაგედიის ჟამს. ვლოცულობ, რომ უკეთესი ადამიანი გახდე. თუმცა, აშკარაა, რომ შენთვის ეს უკვე დაგვიანებულია".

შაპიროს პოსტს ხალიფაც გამოეხმაურა და დაწერა, რომ საკუთარ თავზეა გაბრაზებული.

"პალესტინის მხარდაჭერამ საქმიანი გარიგებები დამაკარგვინა", — დაწერა მან, — "მაგრამ ჩემს თავზე უფრო მომდის ბრაზი, რომ არ შევამოწმე, სიონისტებთან ვიჭერდი თუ არა საქმეს. ჩემი შეცდომაა".

მედიაში გავრცელებული ცნობის მიხედვით, ხალიფასთან ურთიერთობა გაწყვიტა ამერიკულმა გამოცემა Playboy-მაც. როგორც ირკვევა, ფლეიბოის საიტიდან ჯერ ხალიფას პროფილი გაქრა, მოგვიანებით კი კომპანიამ მეილით თავადვე აცნობა მომხმარებლებს ამის შესახებ.

ყოფილი პორნოვარსკვლავის პოსტებს არაერთგვაროვანი გამოხმაურება მოჰყვა X-ის მომხმარებლების მხრიდანაც. ზოგიერთმა ხალიფა პალესტინის მხარდაჭერისთვის შეაქო, ზოგმა კი მოუწოდა, თავადვე ჩასულიყო ღაზის სექტორში.

"მიდი, ღაზაში ჩადი შენი ბოლო ფილმის პოსტერით და გაიმეორე, რაც თქვი. დაგიცდით", — დაწერა ერთ-ერთმა მომხმარებელმა.

მია ხალიფას, რომელიც წარმოშობით ლიბანიდანაა, ტერორისტული ორგანიზაცია ისლამური სახელმწიფო წინათ მოკვლით ემუქრებოდა.

რა ხდება ისრაელში

7 ოქტომბერს, გამთენიისას, ღაზის სექტორიდან ისრაელის მიმართულებით რამდენიმე სარაკეტო თავდასხმა განხორციელდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო, რომელსაც არაერთი ქვეყანა თუ გაერთიანება, მათ შორის ევროკავშირი და აშშ, ტერორისტულ ორგანიზაციად მიიჩნევს. მოულოდნელი შეტევა ბოლო ნახევარი საუკუნის განმავლობაში ისრაელზე ყველაზე მასშტაბური თავდასხმა იყო, მის სამიზნედ კი მშვიდობიანი ადამიანებიც იქცნენ: სროლა თავდაპირველად მუსიკალურ ფესტივალზე დაიწყო, სადაც მონაწილეების ნაწილი დაიღუპა, ნაწილი — მძევლად აიყვანა ჰამასმა, ზოგმა კი გაქცევა მოახერხა. ადგილობრივი მედიის ცნობით, თავდასხმას ისრაელში, სულ მცირე, 600 ადამიანის სიცოცხლე ემსხვერპლა.

თავდასხმის საპასუხოდ, ისრაელმა სამხედრო მობილიზაცია და საომარი მდგომარეობა გამოაცხადა. ქვეყნის პრემიერმინისტრმა ბენიამინ ნეთანიაჰუმ ისრაელის მოქალაქეებს წესრიგის დაცვისკენ მოუწოდა და პირობა დადო, რომ ქვეყანა "ამ ომში გაიმარჯვებს". ისრაელს სოლიდარობა და მხარდაჭერა გამოუცხადეს მსოფლიო ლიდერებმაც, მათ შორის, ევროკომისიის პრეზიდენტმა ურსულა ფონ დერ ლაიენმა, ევროპული საბჭოს პრეზიდენტმა შარლ მიშელმა, უკრაინის პრეზიდენტმა ვოლოდიმირ ზელენსკიმ, გაერთიანებული სამეფოს პრემიერმინისტრმა რიში სუნაკმა და აშშ-ის პრეზიდენტმა ჯო ბაიდენმა.

ასევე იხილეთ: