რატომ არის მნიშვნელოვანი: 18 სექტემბერს სახელმწიფო უსაფრთხოების სამსახურმა განაცხადა, თითქოს "გარკვეული ჯგუფი", რომლებიც ქვეყნის შიგნით და ფარგლებს გარეთ მოქმედებს, დესტაბილიზაციას, არეულობას და ტერორისტულ აქტს გეგმავს, რომლის მიზანი ხელისუფლების ძალადობრივი გზით შეცვლაა.

• უწყებამ ისაუბრა ბარიკადების და კარვების ქალაქის მოწყობის გეგმაზე, შესაძლო აფეთქებაზე და ევრომაიდნის სცენარის განვითარების მცდელობაზე.
• სუს ამტკიცებდა, რომ "დესტრუქციული პროცესების" დაწყების თარიღებად მიმდინარე წლის ოქტომბერ-დეკემბრის პერიოდია შერჩეული, როდესაც ევროკომისიის შუალედური და ევროკავშირის საბოლოო დასკვნა უნდა გამოქვეყნდეს.
• ეს პირველი შემთხვევა არ არის, როდესაც უწყება მსგავსი შინაარსის განცხადებას ავრცელებს და აქამდე კონკრეტული შედეგების ან გამოძიების შემდგომი განვითარების შესახებ ინფორმაცია არ გავრცელებულა.
• უწყებას ამჯერადაც არცერთი მტკიცებულება არ წარმოუდგენია და ბრიფინგზე განცხადების წაკითხვით შემოიფარგლა.
• არასამთავრობო სექტორი ამას საზოგადოებაში შიშის დათესვის მცდელობად აფასებს და საინფორმაციო მანიპულირებას ადარებს, რაც ავტორიტეტული საზოგადოებისთვის არის დამახასიათებელი.

დეტალები: უწყებამ ყოფილი შინაგან საქმეთა მინისტრის, ვანო მერაბიშვილის მოადგილე და ამჟამად უკრაინის სამხედრო დაზვერვის ხელმძღვანელის მოადგილე, გიორგი ლორთქიფანიძე და მის დაქვემდებარებაში მყოფი ქართული წარმოშობის მქონე პირები, მათ შორის მესამე პრეზიდენტის დაცვის ყოფილი წევრი, მიხეილ ბატურინი და უკრაინაში მოქმედი ქართული ლეგიონის მეთაური მამუკა მამულაშვილი დაადანაშაულა.

• მათივე მტკიცებით, დადასტურებული და გადამოწმებული ინფორმაციით, გიორგი ლორთქიფანიძის მიერ შემუშავებული გეგმის შესასრულებლად გამოყენებული იქნება უკრაინაში მებრძოლი ქართული წარმოშობის საკმაოდ დიდი ჯგუფი და "დაინტერესებული მხარის ზეგავლენის ქვეშ მოქცეული ქართველი ახალგაზრდების ნაწილი", რომელთა გადამზადება-წვრთნა მიმდინარეობს პოლონეთი-უკრაინის სახელმწიფო საზღვრის მიმდებარედ.
• სუს ამბობდა იმასაც, თითქოს რევოლუციური სცენარისთვის გამოსაყენებელი ახალგაზრდული ჯგუფების მომზადების მიზნით გამოიყენება ორგანიზაცია CANVAS, რომლის ბირთვსაც შეადგენს ორგანიზაცია სერბული ორგანიზაცია ოტპორი.
• ქართველი ლეგიონის ხელმძღვანელმა განაცხადა, რომ ეს პირდაპირ ნაკარნახევია რუსეთიდან და დაკავშირებულია მათ საქმიანობასთან.
• მიხეილ ბარუტინმა TV პირველთან თქვა, რომ მამუკა მამულაშვილი უკრაინაში ერთხელ ნახა, გიორგი ლორთქიფანიძეს კი რამდენიმე თვის წინ შემთხვევით შეხვდა.
• ილიას უნივერსიტეტის პროფესორმა და ორგანიზაცია CANVAS-ის დირექტორმა, გიორგი მელაძემ დაწერა, რომ არანაირ გადატრიალებას არ გეგმავენ და ამ განცხადების ერთადერთი მიზანია აქტიური ადამიანების დაშინებაა.
• 30 სექტემბერს სუს-ში კანვასის წევრები, სერბეთის მოქალაქეები გამოჰკითხეს — მელაძემ განმარტა, რომ ისინი სამოქალაქო აქტივიზმის გამოცდილების მქონე ადამიანები იყვნენ და საქართველოში ერთ-ერთი პროექტის ფარგლებში ჩამოვიდნენ.
• 2 ოქტომბერს სუს-მა განაცხადა, რომ ისინი საქართველოში USAID-ის პროგრამის ფარგლებში იყვნენ ჩამოსული და ოქტომბერ-დეკემბერში დაგეგმილი "რევოლუციური სცენარისთვის" მოსამზადებელი ტრენინგები ჩაატარეს.
• სუს ამტკიცებს, თითქოს 26-29 სექტემბრის პერიოდში ისინი თბილისში შეხვდნენ არასამთავრობო ორგანიზაციების წარმომადგენლებსა და სამოქალაქო აქტივისტებს, რომლებმაც, "გადამწყვეტი როლი უნდა შეასრულონ ხელისუფლების ძალადობრივი გზით დამხობის პროცესების მომზადებასა და განხორციელებაში."

რას ამბობს კანვას: ორგანიზაცია სუს-ის განცხადებებს ზეწოლის მცდელობად აფასებს, როგორც ორგანიზაციის ხელმძღვანელზე, ის იმ აქტივისტებზე, ვინც ორგანიზაციასთან თანამშრომლობენ, იღებენ განათლებას, ავრცელებენ ცოდნას სტრატეგიული არაძალადობრივი კამპანიების შესახებ.

• "სამოქალაქო საზოგადოების მიერ რუსული კანონის წინააღმდეგ თებერვალ-მარტში წარმატებით წარმოებული კამპანიის საპასუხოდ, სახელმწიფოს უმაღლესი თანამდებობის პირების მხრიდან გავრცელდა მუქარა კანვას – საქართველოს დირექტორის, გიორგი მელაძის მიმართ", — წერს ორგანიზაცია და მომდევნო დღეებში გავრცელებულ განცხადებებს მიმოიხილავს.
• კანვას მოუწოდებს საერთაშორისო უფლებადამცველ ორგანიზაციებს, საქართველოში დემოკრატიისა და ადამიანის უფლებების დაცვით დაინტერესებულ მხარდამჭერებს, ყურადღება მიაქციონ აღნიშნულ ფაქტს და საქართველოში მოქმედ, კერძო და საჯარო რელევანტურ სტრუქტურებთან და ინსტიტუტებთან ურთიერთობისას გაითვალისწინონ ეს თემა, როგორც ერთ – ერთი პრიორიტეტი.
• "მიგვაჩნია, რომ ამგვარი მხარდაჭერა მნიშვნელოვნად დაეხმარება დემოკრატიის გაძლიერებით დაინტერესებულ აქტივისტებს საქართველოში", — ვკითხულობთ განცხადებაში.