ცოტა ხნის წინ ბრიტანეთის ქალაქ სანდერლენდის საბჭომ 8 თვის წინ გარდაცვლილ სიუზან უილსონს გამაფრთხილებელი წერილი მისწერა. წერილში გარდაცვლილს საკუთარი საფლავის დასუფთავებას სთხოვდნენ. გარდაცვლილი ქალის შვილის თქმით, საბჭოს მხრიდან ეს საშინელი საქციელი იყო და დარწმუნდა, რომ ოჯახის ტრაგედიას არ თანაუგრძნობენ.

სანდერლენდის საქალაქო საბჭომ განაცხადა, რომ წერილის გაგზავნა "ადმინისტრაციული შეცდომა" იყო. საბჭომ ასევე განმარტა, რომ სიუზანის საფლავზე განთავსებული ნივთებიდან ზოგიერთი უსაფრთხოების სტანდარტებს არ შეესაბამება და მათ მხოლოდ "უსაფრთხო გარემოს" შექმნა სურდათ. ოჯახის თქმით კი, საფლავზე პატარა ქანდაკებაა განთავსებული, რომელსაც "ბებია" აწერია და ასევე, რამდენიმე მცენარე, რომლებსაც თავად უვლიან.

ფოტო: BBC

სიუზანი თავისი მამის საფლავზე იანვარში დაკრძალეს. ოჯახის თქმით, ვერ შეძლეს საბჭოს მიერ მოთხოვნილი საფლავის ქვა შეეძინათ, რომელიც დაახლოებით 2500 დოლარი ღირს. სასაფლაოდან ქანდაკების აღების შემთხვევაში კი, სიუზანის საფლავი უსახელოდ დარჩება.

სანდერლენდის სასაფლაოზე ახალი რეგულაციები ცოტა ხნის წინ ამოქმედდა, რითაც ადგილობრივების დიდი ნაწილი უკმაყოფილოა. ახალი წესების მიხედვით, სასაფლაოებიდან უნდა აიღონ ყველა უნებართვო ნივთი, მათ შორის, ღობე და ყვავილის დასადგამი სპეციალური ვაზები. ადგილობრივები კი ახალ წესებს აპროტესტებენ, რადგან საფლავისთვის საჭირო ნივთებისთვის დიდი თანხა აქვთ გადახდილი და არ ეთანხმებიან იმ მოსაზრებას, რომ რომელიმე მათგანი უსაფრთხოების ნორმებს არღვევს.