DappGambl-ის ვებსაიტზე გამოქვეყნებული ანალიზის მიხედვით, NFT-ების 95 პროცენტი უბრლოდ უსარგებლოა.

NFT-ები განსაკუთრებით მოთხოვნადი 2021-2022 წლებში იყო. მაშინ ბევრი მას ციფრული ხელოვნების მომავალსაც ეძახდა. NFT განსაკუთრებით აქტუალური მას შემდეგ გახდა, რაც ტვიტერის დამფუძნებელმა ჯეკ დორსიმ თავისი პირველი ტვიტი დაახლოებით 3 მილიონ დოლარად გაყიდა.

2021 წლის აგვისტოში, NFT-ებმა ვაჭრობის რეკორდულ მაჩვენებელს, 2,8 მილიარდ დოლარს მიაღწია. თუმცა, როდესაც პანდემია დასრულდა, მასთან ერთად NFT-ის ბუმმაც იკლო.

უსარგებლო აქტივები

მიმომხილველების ანალიზის მიხედვით, 69 795-ზე მეტ კოლექციას ფაქტობრივად ღირებულება არ გააჩნია. ამ NFT-ებს მსოფლიოში დაახლოებით 23 მილიონი ადამიანი ფლობს. ეს ინვესტიციები ორი წლის წინ მნიშვნელოვანი იყო ახლა კი უსარგებლოა.

რაც შეეხება ყველაზე პოპულარულ NFT-ებს: CoinMarketMap-მა 8 850, ერთ დროს ყველაზე მოთხოვნადი NFT შეისწავლა. მათგან 41 პროცენტის ფასი ახლა თითქმის ნოლია. 41 პროცენტი 5-დან 100 დოლარამდეა შეფასებული და მხოლოდ ერთ პროცენტზე ნაკლები ფასდება 6 000 დოლარზე მეტად.

NFT-ის დასასრული?

ფოტო: Antonina Artemenko/iStock

შეიძლება ვივარაუდოთ, რომ NFT-ებზე მოთხოვნა გაიზარდა და შემცირდა კრიპტოვალუტების პოპულარობის პროპორციულად. და მაინც, ის ტექნოლოგია, რომელიც NFT-ის ქმნის უნიკალურია. ჩნდება შეკითხვა, რატომ მოხდა NFT-ების გაუფასურება? და არის კი ეს დასასრული?

მაგალითად, MacContract Ethereum-ზე ატვირთული NFT-ების საერთო ფასი 13 მილიონი დოლარია, მაგრამ ნავაჭრი 18 დოლარია. ეს მკვეთრი შეუსაბამობა ბევრ რამეზე მეტყველებს.

გარდა ამისა, კრიპტოვალუტების მსგავსად, NFT-ებიც ნახშირბადის ემისიებით გამოირჩევა. NFT მაინინგმა 27 მილიონ კვტ/სთ-ზე მეტი ენერგია მოიხმარა. ეს 2000-ზე მეტი სახლის წლიური ემისიების ტოლფასია.

თუმცა, DappGambl-ის ანალიზის მიხედვით, ეს მაინც არ არის დასასრული. ანალიტიკოსები დარწმუნებულები არიან, რომ NFT ტექნოლოგია თავის ადგილს ისეთ სფეროებში იპოვნის, როგორებიცაა გეიმინგი, სხვადასხვა ციფრული აქტივები, უძრავი ქონების ტოკენიზაცია და სხვა.

თუ სტატიაში განხილული თემა და ტექნოლოგიების სფერო შენთვის საინტერესოა, შემოგვიერთდი ჯგუფში, სადაც ვლაპარაკობთ ტექნოლოგიებზე.