ადამიანის უფლებათა ევროპულმა სასამართლომ საქმეზე ნიკა მელია საქართველოს წინააღმდეგ გადაწყვეტილება დღეს, 7 სექტემბერს გამოაქვეყნა.

რატომ არის მნიშვნელოვანი: საქმე ეხებოდა 2019 წელს, ე.წ. გავრილოვის ღამეს, პარლამენტში შეჭრის ბრალდებით ოპოზიციონერი პოლიტიკოსის, ნიკა მელიას დაკავებასა და ელექტრონული სამაჯურის დამაგრებას.

  • ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით მელიას 30 000-ლარიანი გირაო შეეფარდა და ელექტრონული მეთვალყურეობა დაუწესდა.
  • 2020 წლის პირველ ნოემბერს მიმდინარე აქციაზე ენმ-ის ყოფილმა თავმჯდომარემ, პროტესტის ნიშნად, ელექტრონული მონიტორინგის სამაჯური მოიხსნა, რის შემდეგაც სასამართლომ გირაოს თანხა 40 000 ლარამდე გაზარდა.
  • ხოლო მას შემდეგ, რაც მელიამ გირაოს გადახდაზე უარი განაცხადა, მას პატიმრობა შეეფარდა.
  • გირაოს თანხის შეტანის შემდეგ პოლიტიკოსი 2021 წლის 10 მაისს გათავისუფლდა.
  • მელია სტრასბურგის სასამართლოში ადამიანის უფლებათა ევროპული კონვენციის მე-5 (თავისუფლებისა და უსაფრთხოების უფლება) და მე-18 მუხლების (უფლებების შეზღუდვათა გამოყენების ფარგლები) დარღვევაზე დავობდა.

დეტალები: ევროპულმა სასამართლომ იუსტიციის სამინისტროს არგუმენტაცია გაიზიარა და მელიას საქმეზე არცერთი მუხლის დარღვევა არ დაადგინა.

  • "მიზეზები, თუ რატომ იყო საჭირო პრევენციული ზომების გამოყენება მისი მიმალვის, მტკიცებულებების ხელყოფის ან ხელახალი დანაშაულის ჩადენის თავიდან ასაცილებლად სრულად იყოს წარმოდგენილი გადაწყვეტილებებში. შესაბამისი ეროვნული კანონმდებლობა ითვალისწინებდა გირაოს წინასწარ პატიმრობაში გადაქცევას გირაოს სანაცვლოდ გათავისუფლების დადგენილების დაუცველობის სიტუაციებში", — ნათქვამია სასამართლოს პრესრელიზში.