რატომ არის მნიშვნელოვანი: 31 აგვისტოს სალომე ზურაბიშვილმა საქართველოსთვის კანდიდატის სტატუსის მინიჭების მხარდასაჭერად ევროპელ ლიდერებთან შეხვედრები დაიწყო.

  • მანამდე მთავრობამ განცხადება გამოაქვეყნა და თქვა, რომ პრეზიდენტს ყველა მოთხოვნილ ვიზიტზე უარი უთხრეს, მათ შორის, უკრაინაში.
  • ქართულმა ოცნებამ ზურაბიშვილი ერთხმად გააკრიტიკა — ირაკლი კობახიძე ამბობდა, რომ პრეზიდენტმა უხეშად დაარღვია კონსტიტუცია და "რეაგირების გარეშე ვერ დატოვებდნენ".
  • პირველ სექტემბერს ცნობილი გახდა, რომ ქართული ოცნება პრეზიდენტის იმპიჩმენტის პროცედურას იწყებს.

დეტალები: არასამთავრობო ორგანიზაციების განცხადებით, "ოცნების" გადაწყვეტილება, ევროკავშირში გაწევრიანების მისწრაფებაზე თავდასხმაა.

  • "პრეზიდენტის წინააღმდეგ იმპიჩმენტის დაწყება იმის გამო, რომ ის ევროკავშირის ლიდერებს საქართველოსთვის კანდიდატის სტატუსის მიღების საჭიროებაში არწმუნებს, პირდაპირი იერიშია ევროკავშირზე, რაც ჩვენმა ევროპელმა პარტნიორებმაც აღნიშნეს", — წერენ NGO-ები.
  • ამბობენ, რომ კონსტიტუციის 78-ე მუხლი ავალდებულებს როგორც პრეზიდენტს, ისე მთავრობას, მიიღოს ყველა ზომა ევროკავშირში ინტეგრაციისთვის.
  • "საგანგაშოა, რომ მთავრობა არათუ უგულებელყოფს საკუთარ ვალდებულებას, არამედ საქართველოს პრეზიდენტს — კონსტიტუციურ ორგანოს, ხელს უშლის ჩვენი ისტორიული არჩევანის განხორციელებაში", — ნათქვამია განცხადებაში.
  • მათივე თქმით, სწორედ ევროინტეგრაციის შემაფერხებელი ქმედებებია კონსტიტუციის დარღვევა.
  • "კიდევ ერთხელ შევახსენებთ საქართველოს მთავრობას ქართველი ხალხის ურყევ ნებას ევროკავშირში ინტეგრაციის შესახებ და მოვუწოდებთ, შეწყვიტოს პრეზიდენტის იმპიჩმენტის პროცედურის სახით, ევროინტეგრაციის პროცესის დაზიანება".