ცოტა ხნის წინ კრისტოფერ ნოლანის ოპენჰაიმერის პრემიერა შედგა, რომელსაც მთელი მსოფლიო ელოდა. ოპენჰაიმერი წლის ერთ-ერთ მთავარ კინომოვლენად მალევე იქცა და ფილმმა პრემიერიდან სულ რამდენიმე დღეში $82 მილიონზე მეტი გამოიმუშავა. ახლახან კი ფლორენს პიუმ, რომელიც ოპენჰაიმერში მონაწილეობს, განაცხადა, რომ კრისტოფერ ნოლანმა ფილმში მცირე როლის შეთავაზების გამო მოუბოდიშა.

ფლორენს პიუ ნოლანის ისტორიულ დრამაში კომუნისტური პარტიის წევრის როლს ასრულებს, რომელსაც რობერტ ოპენჰაიმერთან სასიყვარულო ურთიერთობა აქვს. როგორც აღმოჩნდა, კრისტოფერ ნოლანმა ფლორენს პიუს ამ როლის შეთავაზებასთან ერთად ბოდიშიც მოუხადა.

ფოტო: Universal Pictures

"თავიდან არ ვიცოდი, რა ხდებოდა ან რის გადაღებას აპირებდნენ. კრისტოფერს კი სურდა, მცოდნოდა, რომ ეს დიდი როლი არ იყო და გამიგებდა, თუ უარს ვიტყოდი. მე კი ვუთხარი, რომ ამას მნიშვნელობა არ ჰქონდა. კრისტოფერ ნოლანმა მომიბოდიშა და მითხრა, რომ სცენარს გამოგზავნიდა, შემდეგ კი გადაწყვეტილება თავად უნდა მიმეღო. ის საღამოც მახსოვს, როცა სცენარი მივიღე და მალევე მივხვდი, რომ ამას გავაკეთებდი", — განაცხადა ფლორენს პიუმ.

შეგახსენებთ, რომ ოპენჰაიმერი, რომელიც ნოლანისთვის მე-12 ფილმი და პირველი ბიოგრაფიული ნამუშევარია, პულიცერის პრემიის მფლობელ წიგნს ეფუძნება. კაი ბერდისა და მარტინ ჯ. შერვინის წიგნი American Prometheus: The Triumph and Tragedy of J. Robert Oppenheimer ატომური ბომბის შემქმნელი ჯ. რობერტ ოპენჰაიმერის ცხოვრებაზე გვიყვება. კინოსურათში მთავარ როლებს კილიან მერფი, მეთ დეიმონი, ემილი ბლანტი, რობერტ დაუნი უმცროსი და რამი მალეკი ასრულებენ.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...