And Just Like That-ის ფანები მოუთმენლად ელოდნენ იმ ეპიზოდს, რომელშიც კიმ კეტრელის შესრულებით ბევრისთვის საყვარელ პერსონაჟ სამანტას ისევ იხილავდნენ. ჯერ კიდევ ივნისში HBO-მ გაავრცელა ინფორმაცია, რომ კიმ კეტრელს And Just Like That-ის მე-2 სეზონში ვიხილავდით, რაც სერიალის მე-11 სერიაში რეალობად იქცა.

ტრეილერიდან უკვე ვიცოდით, სერიალში სამანტას გამოჩენა სატელეფონო ზარის შესახებ იქნებოდა. როგორც აღმოჩნდა, მონატრებული სამანტა კერის ურეკავს და ლონდონიდან ჩამოსვლის შესახებ ესაუბრება. მართალია, სატელეფონო საუბრის სცენა სულ 71 წამს გაგრძელდა, თუმცა სერიალის ფანების გულის მოსაგებად ეს საკმარისი აღმოჩნდა.

Variety-ის მიხედვით, კიმ კეტრელის მონაწილეობით And Just Like That-ის სცენა 22 მარტს გადაიღეს, თუმცა ამის შესახებ ინფორმაცია დიდი ხნის განმავლობაში არ ვრცელდებოდა. გადაღებების პროცესში კიმ კეტრელს სერიალის სხვა მსახიობებთან და რეჟისორთან ურთიერთობა არ ჰქონია.

სამანტას გამოჩენის შემდეგ ფანებს სერიალში მისი დაბრუნების იმედიც გაუჩნდათ, თუმცა ამის შესახებ არანაირი ინფორმაცია არ ვრცელდება. რაც შეეხება კიმ კეტრელს, მან არაერთხელ აღნიშნა, რომ Sex and the City-ის გაგრძელებაში ან ახალ ფილმში მონაწილეობის მიღება არ სურდა. "სამანტა ჩემი გმირი იყო, თუმცა ახლა დასვენება მინდა", — განაცხადა მსახიობმა 2016 წლის ინტერვიუში.

And Just Like That-ის ფანებისთვის სამანტა დღემდე შეუცვლელი პერსონაჟია, 71-წამიანმა სცენამ კი ისევ შეგვახსენა, თუ რა აკლია სერიალს.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…