რა მოხდა: 18 საათზე მეტი გავიდა, რაც ტერორისტულ ორგანიზაციად აღიარებული დაჯგუფების, ვაგნერის, დამფუძნებელი, ევგენი პრიგოჟინი ავიკატასტროფაში მოკვდა.

• მისი კუთვნილი თვითმფრინავი 23 აგვისტოს, რუსეთში, ტვერის ოლქში ჩამოაგდეს.
• დღეს დილით კი ყველა მგზავრის სიკვდილი ოფიციალურად დადასტურდა.
• დაღუპულებს შორისაა პრიგოჟინის მარჯვენა ხელი, ვაგნერის მეთაური, დიმიტრი უტკინიც, კერძო სამხედრო კომპანიასთან დაკავშირებული კიდევ 5 პირი და ეკიპაჟის 3 წევრი.
• ამ დროისთვის გვამებს ექსპერტიზა უტარდება, ავიაკატასტროფის ადგილზე კი კრიმინალისტები მუშაობენ.
• Flightradar 24-ში, რომელიც ფრენებს აკვირდება, ამბობენ, რომ ავარიამდე თვითმფრინავი არ დაეშვა, არამედ სიმაღლის აკრეფა განაგრძო — "ანუ ის, რაც მოხდა, იყო სწრაფი და მოულოდნელი".

დეტალები: რუსეთის საგამოძიებო კომიტეტი ირწმუნება, რომ ჯერჯერობით ტერაქტის არავითარი ნიშნები არ არსებობს.

• საქმეზე გამოძიება ტრანსპორტის მოძრაობის უსაფრთხოებისა და საჰაერო ტრანსპორტის ექსპლუატაციის წესების დარღვევის მუხლით დაიწყეს.
• თუმცა, სამართალდამცავ უწყებებში ამბობენ, გამოძიება განიხილავს მომხდარის ყველა ვერსიას: "პილოტის შეცდომის, ტექნიკური პრობლემებისა და გარე გავლენის ჩათვლით".

მომხდარის ძირითადი ვერსიები: ტვერის ოლქის მცხოვრებლების მიერ გადაღებულ ავიაკატასტროფის კადრებზე დაყრდნობით, მედუზა მომხდარის მიზეზებს განიხილავს.

• გამოცემა წერს, რომ ჩამოვარდნამდე თვითმფრინავის კონტროლი მთლიანად დაირღვა, ამავდროულად, ხმის მიხედვით თუ ვიმსჯელებთ, ერთი ძრავა მაინც აგრძელებდა მუშაობას, თვითმფრინავის უკან კი კვამლი შეიმჩნეოდა.
• ამ დროისთვის ორი მთავარი კითხვა იკვეთება: თვითმფრინავი გარედან ჩამოაგდეს თუ ბომბი ბორტზე აფრენამდე აიტანეს.
• ანონიმური წყაროები საერთაშორისო მედიებთან ჰყვებიან, რომ დასავლეთი განიხილავს თვითმფრინავის ჩამოგდების ვერსიას რუსული საზენიტო-სარაკეტო სისტემით.
• მედუზას ცნობით, ერთ-ერთ ვიდეოში ჩანს ღრუბელი, რომელიც საზენიტო რაკეტის კვალს ჰგავს.
• გამოცემა წერს, რომ ერთი და იგივე სამიზნეზე ორი საჰაერო თავდაცვის რაკეტის გაშვება სტანდარტული პრაქტიკაა, რაც სამიზნეზე დარტყმის ალბათობას ზრდის.
• ამავე სტატიაში ვკითხულობთ, რომ თვითმფრინავის ზოგიერთ ნამსხვრევზე ჩანს ხვრელების მსგავსი დარტყმის კვალი, მაგრამ სურათების ხარისხი დაბალია, ამიტომ დაზუსტებით მსჯელობა შეუძლებელია. თვითმფრინავიდან ცალკე ჩამოვარდნილ ნამსხვრევებზე კი ასეთი კვალი არ არის.

ასევე, არსებობს არგუმენტი შიდა აფეთქების სასარგებლოდ: თუკი Flightradar 24-ის ცნობით, თვითმფრინავი 28000 ფუტის სიმაღლეზე დაფრინავდა, მის ჩამოგდებას ასეთ მანძილზე საჰაერო თავდაცვის ბევრი სისტემა ვერ შეძლებდა.

• მინიმუმ, საჭირო იქნებოდა საშუალო დიაპაზონის კომპლექსი (მაგალითად, ბუკი), რომელიც უნდა განთავსდეს საჰაერო გზებთან ახლოს, რომლითაც თვითმფრინავი დაფრინავს.
• ასეთი კომპლექსების მძლავრი რაკეტები კი თვითმფრინავს ბევრად უფრო სერიოზულ დარტყმას მიაყენებდა, ვიდრე ეს ავიაკატასტროფის ამსახველ ვიდეოებში ჩანს.