იაპონიაში შემდგარი პრემიერის შემდეგ, ლეგენდარული ჰაიაო მიაძაკის უკანასკნელი ფილმი მსოფლიოს დასაპყრობად ემზადება. ნამუშევარი, სახელწოდებით როგორ ცხოვრობ? (ინგლისურენოვან ვერსიას ბიჭი და ყანჩა ერქმევა), კინოკრიტიკოსებმა უკვე შეაფასეს "შედევრად". თუმცა, აღსანიშნავია, რომ პრემიერამდე ფილმის შესახებ ფაქტობრივად არაფერი იყო ცნობილი, რადგან არც ტრეილერი გავრცელებულა და არც — სიუჟეტის აღწერა.

ახლა კი, კინობილეთების გამყიდველმა ამერიკულმა კომპანია Fandango-მ ფილმიდან პირველი კადრებიც გაავრცელა. შეიძლება ამ ოთხი სურათიდან შინაარსზე ბევრი ვერაფერი გავიგეთ, მაგრამ ერთ რამეში მაინც დავრწმუნდით — მიაძაკისეული დახვეწილი, ორიგინალური ხელწერა არ შეცვლილა.

ფოტო: Studio Ghibli

ფოტო: Studio Ghibli

ფოტო: Studio Ghibli

მიაძაკის უკანასკნელი ნამუშევრის სახელი აღებული აქვს იაპონელი მწერლის, იოშინო გენძაბუროს, წიგნის სათაურიდან, თუმცა, ფილმის სიუჟეტი ნაწარმოებს არ ეფუძნება. აქ ამბავი მოზარდ ბიჭზეა, რომელიც თავის პატარა ქალაქში მიტოვებულ კოშკს აღმოაჩენს და მოლაპარაკე ყანჩასთან ერთად ჯადოსნურ სამყაროში აღმოჩნდება.

გამოცემა Time Out Japan-ის მიმომხილველმა ფილმს "სრულყოფილი, მრავალშრიანი შედევრი" უწოდა, The Verge-ის კრიტიკოსმა კი ის მიაძაკის შემოქმედებაში ერთ-ერთ საუკეთესო ნამუშევრადაც შეაფასა.

"ფილმში ყველაფერი გარდასულ დღეთა მოგონების სევდას ერწყმის, სენტიმენტალურობისგან დაცლილ გააზრებას იმისა, რომ წარსული ვეღარ დაბრუნდება", — დაწერა Polygon-ის მიმომხილველმა სეზარი იან სტრუშიევიჩმა, — "ამ განწყობით კი რეჟისორმა თითქოს ბოლოჯერ შეავლო თვალი თავის შემოქმედებას ფარდის ჩამოფარებამდე".

ამერიკელი მაყურებელი მიაძაკის უკანასკნელ ნამუშევარს, სავარაუდოდ, წელსვე იხილავს. ეპოქალური რეჟისორის ახალი ფილმის ჩვენების უფლება სხვა რამდენიმე ქვეყანაშიც გაყიდულია უკვე.

ასევე იხილეთ: