რეჟისორი და სცენარისტი ფრენსის ფორდ კოპოლა ბარბისა და ოპენჰაიმერის წარმატებაზე დაყრდნობით ("ბარბენჰაიმერი") კინოს ოქროს ხანას წინასწარმეტყველებს. კინოინდუსტრიაში ამას "ბარბენჰაიმერის კულტურული ფენომენიც" კი უწოდეს.

ამ სფეროში იმაზეც დაიწყეს მსჯელობა, "ბარბენჰაიმერის" წარმატება შემთხვევითობაა თუ ჰოლივუდმა იპოვა ახალი გზა, რომლითაც მაყურებლის დაინტერესებას შეძლებს. ნათლიის რეჟისორმა ამ თემაზე სოციალურ ქსელში ისაუბრა. მისი თქმით, ამ ფილმების წარმატება კინოს გამარჯვებაა.

"ფაქტი, რომ მაყურებლები ბარბისა და ოპენჰაიმერის სანახავად დიდ კინოთეატრებს ავსებენ და არცერთი მათგანი არც რომელიმე ფილმის გაგრძელება ან წინაისტორიაა (რომ მათი წარმატება ამისთვის დაგვებრალებინა), კინოს ნამდვილი გამარჯვებაა", — აღნიშნავს კოპოლა.

კინოინდუსტრიაში ძირითადად პესიმისტურად არიან განწყობილი და ფიქრობენ, რომ ამ სფეროს კარგი მომავალი არ აქვს, თუმცა კოპოლა პირიქით ფიქრობს — მისი თქმით, კინოს კიდევ უფრო დიდი წარმატება ელის.

"ჩემი აზრით, ახლა ჩვენ კინოს ოქროს ხანაში შევდივართ", — ამბობს ის.

ბარბის პრემიერა 21 ივლისს შედგა და მაყურებლების მოლოდინიც გაამართლა. მისი გამოსვლიდან ორ დღეში ფილმის შემოსავალმა $155 მილიონი შეადგინა. გრეტა გერვიგის ბარბის ქალი რეჟისორების ფილმებიდან კომერციულად ყველაზე წარმატებული პრემიერა ჰქონდა.

იხილეთ ასევე: