ტექნოლოგიურ პარკში ტელეკომპანია პირველის ჟურნალისტის, ნინო ჟიჟილაშვილის კითხვაზე, არის თუ არა ივანიშვილის მხრიდან შერჩევითი მეხსიერება, როცა წარსულს მხოლოდ ნიკა გვარამიას უხსენებს და ლევან მურუსიძეს პასუხისმგებლობისგან ათავისუფლებს, ივანიშვილმა უპასუხა რომ მურუსიძის თემას რუსთავი 2 ამუქებს, რადგან ის ნაციონალურ მოძრაობას აღარ ემორჩილება, როგორც ადრე:

"ეს უნდა რუსთავი 2-ს, რატომღაც ააგორეს რომ ეს [მურუსიძე] არის ასეთი ცუდი მოსამართლე, მთელი სასამართლო არის ესეთი, შესაბამისად რუსთავი 2-ს არასწორად ასამართლებენ. ამისი პასუხი მარტივია და მთავარი პასუხი ისაა, რომ მთელი სასამართლო რომ გადაქცეული ჰყავდათ და მართავდნენ როგორც სურდათ, აბა გაებედა ნებისმიერ მოსამართლეს და არა ნებისმიერ სხვას, და ისე არ გაეკეთებინა როგორც ეტყოდნენ. ხომ არ გგონიათ რომ მას მარტო გაათავისუფლებდნენ? მას ციხეში გაუშვებდნენ. შეიძლება უარესსაც უზავდნენ.

მთელი სასამართლო იყო მძევალი ამ სისტემის. ეს კაცი რატო გამოარჩიეს? დღეს დამისახელეთ ერთი მაგალითი, რომელიც ახალი მმართველობის პროცესში რაც მოვიდა ახალი ხელისუფლება ასეთ დონეზე აწეულიყოს. მე უამრავ თემებს დაგისახელებთ, მათგან, რომლებიც აუწევიათ, და დაჭერას მათგან, როგორც ნაცმოძრაობას და მის მიერ მართულ მედიას სჩვევია.

ამ გაუგებარ პროცესში ბევრი ჩაერთო, მათ შორის პრეზიდენტიც. და იმის მიუხედავად რომ მათ წისქვილზე ხშირად ასხავს წყალს, არ მგონია რომ პრეზიდენტი მათი კაცი იყოს. მათგანაც გამოუყენებელია და მათთვისაც არაა დიდად სასარგებლო.

თუ თქვენ მეტყვით, რომ სხვა ძალასაც შეუძლია ესე თემა ასწიოს პროპაგანდისტულად და დიდი ხნის განმავლობაში დაიჭიროს, მაშინ შევიცვლი ჩემს პოზიციას.

იმიტომ აგინებენ მურუსიძეს, რომ მათ აღარ ემორჩილება და ეს უნდა გიხაროდეთ თქვენ და საზოგადოებას, და ახლა ამბობენ რომ მან გააკეთა გირგვლიანის საქმეზე ეს ყველაფერი და არა იმ სასამართლომ და სისტემამ, რომელსაც სააკაშვილი მართავდა. და დღეს ეს გუნდი ედავება მას, ვისი მსხვერპლიც იყო მურუსიძე და მთელი სასამართლო სისტემა".