20 ივლისს, ჯორჯიან უოთერ ენდ ფაუერის მმართველმა კომპანიამ, ევროპულმა დარგობრივმა ინვესტორმა, აქუალიამ მედიასთან პირველი შეხვედრა გამართა და საზოგადოებას ქვეყანაში $180-მილიონიანი ინვესტიციის განხორციელების შემდეგ გასულ 1 წელზე მეტში გაწეული სამუშაოს შესახებ მიაწოდა ინფორმაცია.

GGU ჯგუფისა და ჯორჯიან უოთერ ენდ ფაუერის ახალმა გენერალურმა დირექტორმა, ხოსე მიგელ სანტოს გონსალესმა და GWP-ის განვითარების დირექტორმა, ზურა ალფაიძემ ასევე ისაუბრეს სამომავლო გეგმებზე, რომლებიც, მათ შორის, ინფრასტრუქტურისა და სერვისის გაუმჯობესებას გულისხმობს.

როგორია აქუალიას გამოცდილება

აქუალია ევროპაში სიდიდით მეოთხე წყალმომარაგების კომპანიაა, ხოლო მსოფლიოში მეცხრე, რომელიც მხოლოდ წყალმომარაგების მიმართულებით მუშაობს და მომსახურებას უწევს ახლო აღმოსავლეთს, ლათინურ ამერიკას თუ ევროპის ქვეყნებს, მათ შორის, ესპანეთს, საფრანგეთს, იტალიას, პორტუგალიას, ჩეხეთს, რუმინეთსა და ახლა უკვე საქართველოს. აღსანიშნავია, რომ გასულ წელს, აქუალია წყალმომარაგების სექტორის საუკეთესო კომპანიად დასახელდა.

როგორ შედგა GWP-ისა და აქუალიას შეთანხმება

ჯორჯიან უოთერ ენდ ფაუერი სამი ქალაქის — თბილისის, რუსთავისა და მცხეთის წყალმომარაგებაზე ზრუნავს და საქართველოს მოსახლეობის ნახევარზე მეტს ამარაგებს წყლით.

ზურა ალფაიძის თქმით, აღნიშნული მასშტაბი დიდ პასუხისმგებლობას გულისხმობს, ამიტომ კომპანიისთვის განსაკუთრებით მნიშვნელოვანი იყო, რომ მართვის სადავეები გამოცდილი ინვესტორისთვის გადაეცათ.

"ქართული წყალმომარაგების ბაზარზე ყველაზე მსხვილი კომპანია ვართ, რადგან საქართველოს მოსახლეობის ნახევარზე მეტი ჩვენ მიერ მოპოვებული, გაფილტრული წყლით მარაგდება, ამიტომ ძალიან მნიშვნელოვანი იყო, რომ მმართველი გამხდარიყო ისეთი კომპანია, რომელსაც დარგობრივი გამოცდილება ექსპერტულ დონეზე აქვს", — აღნიშნა მედიასთან შეხვედრაზე ზურა ალფაიძემ.

ხოსე მიგელ სანტოს გონსალესის თქმით, აქუალიას, რომელიც 18 ქვეყნის 43 მილიონზე მეტ მოქალაქეს ემსახურება, წლების ექსპერტიზა, გამოცდილება და ცოდნა აქვს, რომელსაც საქართველოში სექტორის განვითარებისთვის გამოიყენებს.

"ჩვენი პრიორიტეტი ხარისხიანი წყალმომარაგება და მომხმარებლის კმაყოფილებაა. ყველაფერს გავაკეთებთ, რომ საქართველოშიც ამ პრინციპს ვუერთგულოთ. ვიზრუნებთ ინფრასტრუქტურისა და სერვისის გაუმჯობესებაზე, ამასთან გარემოსდაცვით, ენერგოეფექტურ მეთოდებს დავნერგავთ. საქართველოს ევროპულ გამოცდილებას, რესურსს ვპირდებით, რომელიც ქართული წყალმომარაგების სექტორზე დადებით გავლენას იქონიებს და მდგომარეობას ბევრად გააუმჯობესებს", — აღნიშნა ხოსე მიგელ სანტოს გონსალესმა.

რა სახის სამუშაო ჩატარდა ინვესტირების შემდეგ

ერთ წელზე მეტი გავიდა მას შემდეგ, რაც აქუალიამ საქართველოში ინვესტიცია განახორციელა. ამ პერიოდში აქტიურად მიდიოდა კვლევითი სამუშაოები, ინფრასტრუქტურის შესწავლა თუ ოპერაციული ნაწილის ანალიზი, რაც სამოქმედო გეგმის დასახვისთვის იყო აუცილებელი.

ზურა ალფაიძემ შეხვედრაზე განაცხადა, რომ ჯორჯიან უოთერ ენდ ფაუერის წყალმომარაგების სისტემის მასშტაბიდან გამომდინარე, ეს შრომატევადი, ხანგრძლივი პროცესი იყო, რომელიც ყველა დეტალის საფუძვლიან მოკვლევას მოიცავდა, მათ შორის, 6 სათავე ნაგებობისა და წყალმომარაგების 4 ათას კილომეტრზე მეტი სიგრძის ქსელის დათვალიერებას.

"კვლევის შედეგებზე დაყრდნობით შემუშავდება სამოქმედო გეგმა, რაც აუცილებელია, რადგან, ერთი მხრივ, არსებული პრობლემების აღმოფხვრისთვის სამოქმედო ნაბიჯების დასახვაში გვეხმარება, მეორე მხრივ, ქალაქის განვითარებასთან ერთად თანმდევი სერვისების დაგეგმვას აადვილებს", — აღნიშნა ზურა ალფაიძემ.

ხოსე მიგელ სანტოს გონსალესის თქმით, აქუალიას გამოცდილი თანამშრომლები, რომლებსაც წლების ექსპერტიზა აქვთ, საკუთარ ცოდნას ადგილობრივად დასაქმებულ ადამიანებსაც გაუზიარებენ და ძალისხმევას არ დაიშურებენ, რომ ერთობლივი იდეის გარშემო შეჯერდნენ და მოქალაქეებს უმაღლესი ხარისხის მომსახურება და სასმელი წყალი მიაწოდონ.

კომპანიის წარმომადგენლებმა მედიასთან აღნიშნეს ისიც, რომ მოკვლევის შედეგების შესახებ დეტალურ ინფორმაციასა და კონკრეტულ სამოქმედო გეგმას საზოგადოებას მომდევნო თვეში გააცნობენ.