რატომ არის მნიშვნელოვანი: თბილისის საქალაქო სასამართლოს გადაწყვეტილებით, პრორუსული, ძალადობრივი და ჰომოფობიური ჯგუფის წევრს, ხატია ჯანაშიას არასრულწლოვანის ფოტო-ვიდეო მასალის გამოყენება და ბავშვთან მაიდენტიფიცირებელი ნებისმიერი ინფორმაციის გასაჯაროება აეკრძალა.

  • ასევე, სასამართლომ ბავშვის მიმართ დამცავი ორდერი გამოსცა.
  • არასრულწლოვანის ინტერესების უფლებადამცველი ორგანიზაციის, PHR-ის განცხადებით, ეს გადაწყვეტილება პრეცედენტულია.
  • "სასამართლომ დაადასტურა, რომ ბავშვის მიმართ ძალადობას ჰქონდა ადგილი, რისი აღკვეთაც ევალებოდა შსს-ს და მათ ეს არ გააკეთეს", — ამბობს იურისტი, ანა თავხელიძე ფორმულასთან.
  • "ეს საქმე გახდება სხვა ბავშვების დამცველიც, რომ ვერავინ, ვერასდროს გაბედოს ჩვენი შვილების უფლებების შელახვა", — წერს არასრულწლოვანის მამა, გიორგი კეპულაძე.
  • ბავშვის დედის, ელისო ჯარიაშვილის თქმით კი, სასამართლომ შექმნა პრეცედენტი და ჰომოფობიური ჯგუფები გამოაცხადა მოძალადეებად.

რა მოხდა: პრაიდის კვირეულის დროს ჰომოფობიური ორგანიზაციის ერთ-ერთმა წევრმა ვიდეო გაავრცელა, სადაც არასრულწლოვანის კადრები უკონტექსტოდ იყო ჩასმული.

  • ვიდეოს ჰომოფობიური ჯგუფის წევრები ე.წ. ლგბტ პროპაგანდის "სადემონსტრაციოდ" აზიარებდნენ.
  • ბავშვის მშობლები ვიდეოს წაშლას ითხოვდნენ და შსს-ს მიმართავდნენ, თუმცა უწყებას რეაგირება არ ჰქონია.