ერთიანი ნაციონალური მოძრაობის თბილისის მერობის კანდიდატი, ზაალ უდუმაშვილი სითი პარკის საჯარიმო ავტოსადგომზე მივიდა და ადგილიდან კომპანია გააკრიტიკა.

თბილისის მერობის კანდიდატი აცხადებს, რომ საჯარიმო ავტოსადგურზე ყოველდღიურად ათობით მოქალაქის მანქანა გადმოჰყავთ, არასწორი პარკირებისთვის, თუმცა ის, რომ ქალაქში საპარკინგე ადგილები არაა, თავად სითი პარკის ბრალია და არა მოქალაქეების:

"როგორ უნდა დაპარკინგდე იმ ქალაქში, სადაც არცერთი პარკირება არ არსებობს, და ვისი ბრალია ეს, ჩვენი, თბილისელი მძღოლების თუ სითი პარკის?"

უდუმაშვილი აცხადებს, რომ სითი პარკთან 2025 წლამდე კაბალური ხელშეკრულების გაფორმება ნაციონალური მოძრაობის შეცდომაა. მისი თქმით, კომპანიამ ქალაქში "რამდენიმე ხაზი გაავლო" და ამის შედეგად ყოველწლიურად მილიონობით ბეგარას იღებს.

უდუმაშვილის თქმით, მერად არჩევის შემთხვევაში, ის თბილისს სითი პარკს ჩამოაშორებს. უდუმაშვილი პირობას დებს, რომ მონახავს ინვესტორს, რომელსაც შესთავაზებენ შეღავათიან პირობებს, თუმცა ის ვალდებული იქნება, მოაწესრიგოს საპარკინგე ინფრასტრუქტურა და სანქციები თავად გადაიხადოს.