ამერიკელი სუპერმოდელი ჯიჯი ჰადიდი კაიმანის კუნძულებზე მარიხუანის ფლობისთვის დააკავეს.

ჰადიდი და მისი მეგობარი კუნძულ დიდ კაიმანზე აშშ-იდან კერძო თვითმფრინავით ჩაფრინდნენ. ოუენ რობერტსის საერთაშორისო აეროპორტში მათი ბარგი ძალოვანმა უწყებებმა გაჩხრიკეს და მარიხუანის მცირე რაოდენობა აღმოაჩინეს. ადგილობრივი გამოცემების ცნობით, ჰადიდი და მოდელის თანმხლები კანაფისა და მის მოსახმარებლად საჭირო ნივთების ფლობისთვის დააკავეს და იზოლატორში გადაიყვანეს.

მოდელმა და მისმა მეგობარმა თავი დამნაშავედ ცნეს. საბოლოოდ, ისინი $1 000-ით დაჯარიმდნენ და გათავისუფლდნენ.

ჰადიდის წარმომადგენელმა ამერიკულ გამოცემა CBS News-თან განაცხადა, რომ 28 წლის მოდელს მარიხუანა კანონიერად, სამედიცინო ლიცენზიის საშუალებით ჰქონდა შეძენილი ნიუ-იორკში. ამასთან, დიდი კაიმანის კუნძულზე კანაფის სამედიცინო მიზნით მოხმარება 2017 წლიდანაა დაშვებული.

თავად ჰადიდი მომხდარს გაკვრით შეეხო ინსტაგრამზე გამოქვეყნებულ პოსტში; მას შემდეგ, რაც ამბავი მედიაში გახმაურდა, მოდელმა კაიმანის კუნძულებზე გადაღებული ფოტოები განათავსა და დაწერა, რომ "ყველაფერი კარგია, რაც კარგად მთავრდება".