USAID ხელს უწყობს საქართველოს ახალგაზრდების, ადგილობრივი თემების გაძლიერებასა და სამოქალაქო განათლების წახალისებას.

სამოქალაქო განათლების საზაფხულო ბანაკები, ფორუმები, კონფერენციები, საგრანტო კონკურსები და სკოლებში დაფუძნებული სამოქალაქო განათლების კლუბები ჩამონათვალია იმ აქტივობების, რაშიც USAID-ის მომავლის თაობის პროგრამის ფარგლებში, ალექსანდრე ბუთხაშვილს მონაწილეობა აქვს მიღებული.

"USAID/საქართველოსთან თანამშრომლობა სწორედ იმ ასაკიდან დავიწყე, როდესაც მე და ჩემს თანატოლებს განსაკუთრებული ინტერესი გაგვაჩნდა უკეთესად შეგვეცნო საზოგადოებრივი პროცესები. სწორედ USAID-ის მხარდაჭერით განხორციელებული პროექტები უდევს საფუძვლად ჩვენი თაობის მსოფლმხედველობას, რომელსაც ესმის თავისუფლებისა და დემოკრატიის მნიშვნელობა", — ამბობს ალექსანდრე.

"თამამად შემიძლია აღვნიშნო, რომ სამოქალაქო განათლების პროგრამამ შეცვალა ჩემი ცხოვრების წესი. მომცა საშუალება აღმომეჩინა საკუთარი შესაძლებლობები; საზოგადოებისათვის სასარგებლო საქმიანობით მიღებულმა დადებითმა ემოციებმა კი მეტი მოტივაცია მომცა. სამოქალაქო პროგრამის არაერთ პროექტში მონაწილეობამ უპირველეს ყოვლისა პრობლემის სწორი იდენტიფიკაცია, მათი აღმოფხვრის გზების მოძიება მასწავლა და რაც მთავარია, მოქალაქის როლის პასუხისმგებლობის გააზრება შემაძლებინა".

ფოტო: USAID

სამოქალაქო განათლების პროგრამის აქტივობებში მონაწილეობა ალექსანდრესთვის არაერთი წარმატების საწინდარი გახდა. 2014 წელს იყო ქართული დელეგაციის წევრი სტრასბურგში და ევროპის საბჭოში ესწრებოდა ოფიციალურ შეხვედრებსა და ლექციებს ევროპულ დემოკრატიაზე.

"მეგობრობა საზღვრებს და მანძილს არ სცნობს, მეგობარი მუდმივად მზადაა გასაჭირში მხარში დაგიდგეს, USAID-ი ჩემთვის მეგობარივითაა, მისი მხარდაჭერითა და სხვადასხვა პროგრამაში მონაწილეობით ჩემი წარმატების არაერთი კარი გაიღო".