USAID მხარს უჭერს დასაქმებულთა შრომითი უფლებების დაცვას, მათთვის უსაფრთხო სამუშაო პირობების უზრუნველყოფას და ამ საკითხებზე კონსულტაციების გაცემას.

გიგა ბექაური 2017 წლიდან აქტიურად მუშაობს შრომით საკითხებზე, იკვლევს დასაქმებულთა შრომით უფლებებს და დასაქმებულებს ეხმარება საკუთარი ინტერესების დაცვაში.

"წლების განმავლობაში ათობით სხვადასხვა პროცესში ათასობით დასაქმებულთან ერთად გავიარე საკმაოდ რთული გზა და მიხარია, რომ დიდი ნაწილი გამარჯვებით დამთავრდა. მომიწია არაერთი ღირსეული მშრომელის თანამებრძოლი ვყოფილიყავი ქვეყნის სხვადასხვა ქალაქში: აგარაში მეშაქრეებთან, რუსთავში აზოტის საწარმოს მშრომელებთან, თბილისში ავიამშენებლებთან, ჭიათურაში მაღაროელებთან და ამ პერიოდის განმავლობაში ჩვენმა გამარჯვებამ ბევრი მშრომელი გაამხნევა და მცირედით შეუმსუბუქა სოციალური სიდუხჭირე", — ამბობს გიგა.

გიგა უფასო იურიდიულ დახმარებას სთავაზობს დასაქმებულებს და ცნობიერების ამაღლებაში უწყობს ხელს.

"ბევრი მიზეზის გამო მშრომელებისთვის უფასო იურიდიული დახმარების გაწევაც კი ძნელდება, ასეთ დროს განსაკუთრებით მნიშვნელოვანია პარტნიორი ორგანიზაციის მხარდაჭერა. USAID-ის ჩართულობით არაერთი მშრომელისთვის გახდა ხელმისაწვდომი შრომის კოდექსის სიკეთეებით სარგებლობა".

ფოტო: USAID

როგორც გიგა ამბობს, ბოლო ერთი წლის განმავლობაში, USAID-თან თანამშროლობით განსაკუთრებით გაძლიერდა შრომითი უფლებების ლობირება კულტურის სფეროში.

"ორგანიზაცია გილდიასა და USAID-ის მხარდაჭერით დასაქმებულებს ყოველდღიურად ემსახურება იურიდიული და საექსპერტო ჯგუფი, რაც უკვე ათობით მოგებულ შრომით დავას მოიცავს", — ამბობს გიგა

"ბრძოლა შრომითი უფლებების დასაცავად და დასაქმებულთა გასაძლიერებლად ეროვნული ინტერესის საგანია, ნებისმიერი ვინც ამ წინააღმდეგობაში მცირედით მაინც გააძლიერებს სახალხო ხმას ეროვნული საქმის ხელშემწყობია. ასეთი მხარდამჭერის და ამ საქმეში მეგობრის ნათელი მაგალითი კი სწორედ რომ USAID-ია".