რატომ არის მნიშვნელოვანი: ქალთა უფლებებსა და გენდერულ თანასწორობაზე მომუშავე ორგანიზაციები მიუღებელს უწოდებენ ნინო წილოსანის ბოლოდროინდელ პოლიტიკურ ქმედებებსა და განცხადებებს.

• აღნიშნავენ, რომ ისინი ფუნდამენტურად ეწინააღღდეგება თანასწორობის პრინციპს, დისკრიმინაციულია და აღვივებს ძალადობას.
• "მიგვაჩნია, რომ გენდერული თანასწორობის საბჭოს მოქმედი თავმჯდომარე ვერ ასრულებს მასზე დაკისრებულ მოვალეობას, ვერ იაზრებს პროფესიულ პასუხისმგებლობას, ბოროტად და არამართებულად იყენებს გენდერული თანასწორობის იდეას;
• "ხოლო როცა თანასწორობის ღირებულებები წინააღმდეგობაში მოდის პარტიულ დღის წესრიგთან, ნინო წილოსანი უპირატესობას პარტიულ ინტერესებს ანიჭებს. აღნიშნული შეფასება ეყრდნობა ქვემოთ მოყვანილ რამოდენიმე ფაქტს ახლო წარსულიდან".

კერძოდ, ორგანიზაციები ხაზს უსვამენ, რომ ნინო წილოსანმა მხარი დაუჭირა შალვა რამიშვილს, რომელიც რამდენიმე ქალმა მნიშვნელოვანი მტკიცებულებების წარდგენით სექსუალურ ძალადობაში ამხილა.

• ასევე, წილოსანი ერთ-ერთია იმ 78 დეპუტატს შორის, რომელმაც დაჩქარებული წესით ხმა მისცა რუსული კანონის ანალოგს და შესაბამისად, არასამთავრობო სექტორის მარგინალიზაციასა და დევნას.
• გასული წლის ბოლოს მხარი დაუჭირა და წარმატებულ ინიციატივად შეაფასა საქართველოს გენდერული თანასწორობის სახელმწიფო კონცეფცია, რომელიც, NGO-ების განმარტებით, გენდერულად არამგრძნობიარე და არაინკლუზიური დოკუმენტია.
• ასევე, აღნიშნავენ, რომ ამ წლის 27 ივნისს ნინო წილოსანმა პარლამენტის ტრიბუნიდან თანაპარტიელ კაცებს დეპუტატი ანა წითლიძის მიმართ ძალადობისკენ მოუწოდა, კერძოდ კი განაცხადა:
• "ქალბატონმა ანა წითლიძემ მამუკა მდინარაძის და ბექა ოდიშარიას დაპირება გაიხსენა და მე დარწმუნებული ვარ, რომ მამუკაც და ბექაც თავის დაპირებას აუცილებლად შეასრულებენ მათ მიმართ, ვინც გაბედავს და პრორუსებს დაგვიძახებს".
• მანამდე კი ბექა ოდიშარიამ თქვა, რომ ვინც მათ პრორუსს დაუძახებს, "მიიღებს ცხვირ-პირში".

აქედან გამომდინარე, ორგანიზაციები მიიჩნევენ, რომ არსებული თავმჯდომარის პირობებში გენდერული თანასწორობის საბჭოსთან თანამშრომლობის შესაძლებლობა ამოწურულია.

• "შესაბამისად, ნინო წილოსანს მოვუწოდებთ, დაუყოვნებლივ დატოვოს გენდერული თანასწორობის მუდმივმოქმედი საპარლამენტო საბჭოს თავმჯდომარის თანამდებობა".
• "ამასთან, მივიჩნევთ, რომ გენდერული თანასწორობის მუდმივმოქმედი საპარლამენტო საბჭოს ეფექტიანი ფუნქციონირებისთვის არსებითია მის ხელმძღვანელად დაინიშნოს ადამიანი, ვინც არა მხოლოდ დეკლარირებულად, არამედ საქმით ემსახურება თანასწორობისა და თანასწორუფლებიანობის იდეებს".

ხელს აწერენ: ქალთა მოძრაობა; ქალთა ინიციატივების მხარდამჭერი ჯგუფი (WISG); ქალები საერთო მომავლისათვის (WECF) — საქართველო; ქალების ჯანმრთელობისა და კეთილდღეობისათვის (ფემეა) თბილისი პრაიდი;

• პარტნიორობა ადამიანის უფლებებისთვის (PHR); თანასწორობის მოძრაობა ქალთა ფონდი საქართველოში; ქალები საქართველოდან; საფარი; რაჭის სათემო ორგანიზაცია; ახალგაზრდა ფემინისტები; GrlzWave; ფემინა; ღია სივრცე კავკასია;
• ქალი და განვითარება; ფემინისტური ინიციატივების ფონდი; მწვანე ალტერნატივა; საქართველოს დემოკრატიული ინიციატივა; საქართველოს სასამართლოს გუშაგი; წამების მსხვერპლთა ფსიქოსოციალური და სამედიცინო რეაბილიტაციის ცენტრი (GCRT); სოციალური სამართლიანობის ცენტრი; უფლებები საქართველო.